ඓතිහාසික මහනුවර ඇසළ පෙරහැර මංගල්‍යයේ නිල දින වකවානු මෙන්න.. කප් සිටුවීම අගෝස්තු 13 වැනිදා සුබ නැකතින්..|Hiru TV Blog

ඓතිහාසික මහනුවර ඇසළ පෙරහැර මංගල්‍යයේ නිල දින වකවානු මෙන්න.. කප් සිටුවීම අගෝස්තු 13 වැනිදා සුබ නැකතින්..

Wednesday, 08 July 2026 - 17:30 | Views - 83

ලෝකවාසී බෞද්ධ ජනතාවගේ ඉහළම ගෞරවාදයට පාත්‍ර වූ ඓතිහාසික මහනුවර ශ්‍රී දළදා මාලිගාවේ වාර්ෂික ඇසළ පෙරහැර මංගල්‍යය පැවැත්වෙන දින වකවානු සහ චාරිත්‍ර වාරිත්‍ර කාලසටහන නිල වශයෙන් ප්‍රකාශයට පත් කර තිබෙනවා.

පෙරහැර මංගල්‍යයේ ආරම්භක චාරිත්‍රය වන "කප් සිටුවීම" අගෝස්තු මස 13 වැනිදා පූර්වභාග 06:17 ට යෙදෙන සුබ නැකත් මුහුර්තයෙන් සිදු කිරීමට නියමිත බව දියවඩන නිලමේ ප්‍රදීප් නිලංග දෑල සඳහන් කළා.

අද (08) පස්වරුවේ දළදා මාලිගා පරිශ්‍රයේ පැවැති විශේෂ සාකච්ඡාවකදී මෙම තීරණ දැනුම් දෙනු ලැබුවා.බැතිමතුන්ගේ සහ සංචාරකයන්ගේ පහසුව උදෙසා මෙවර ඇසළ පෙරහැර මංගල්‍යයේ සම්පූර්ණ දින දර්ශනය පහත පරිදි පෙළගස්වා තිබෙනවා.

ඒ අනුව අගොස්තු 13වැනිදා කප් සිටුවීමෙන් පසු 17වැනිදා දක්වා දින 5ක් නාථ, විෂ්ණු, පත්තිනි හා කතරගම සිව් මහා දේවාල අභ්‍යන්තර පෙරහැර පැවැත්වේ.

පළමු කුඹල් පෙරහැර 18 දින ආරම්භ වන අතර, එතැන් සිට 22වැනිදා දක්වා එම පෙරහැර පැවැත්වේ.

පළමු රන්දෝලි පෙරහැර 23 දින ආරම්භ වන අතර, අවසන් මහා රන්දෝලි පෙරහැර 27 දිනයේ පැවැත්වේ.

පසුදින එනම් අගෝස්තු 28 වැනිදා දිය කැපීමේ පෙරහැර හා දහවල් පෙරහැර පැවැත්වීමට කටයුතු යොදා තිබෙනවා.

ඉන් අනතුරුව එදිනම පස්වරුවේ මහනුවර ජනාධිපති මන්දිරයේදි පෙරහැර සාර්ථකව සිදු කළ බවට දියවඩන නිලමේ විසින් ජනාධිපතිවරයා වෙත පෙරහැර සංදේශය භාරදීමට නියමිතයි.

මෙම නිල දින වකවානු ප්‍රකාශයට පත් කිරීමේ අවස්ථාව සඳහා අස්ගිරි පාර්ශවයේ අනුනායක පූජ්‍ය නාරම්පනාවේ ශ්‍රී ආනන්ද නාහිමි, මල්වතු පාර්ශ්වයේ නියෝජ්‍ය ලේඛකාධිකාරි පූජ්‍ය මහවෙල රතනපාල නාහිමි ඇතුළු මහා සංඝරත්නය ද, සිව් මහා දේවාලවල බස්නායක නිලමේවරුන්, මහනුවර දිස්ත්‍රික් ලේකම් ඉන්දික උඩවත්ත සහ නියෝජ්‍ය පොලිස්පති සුදත් මාසිංහ ඇතුළු රාජ්‍ය නිලධාරීන් පිරිසක් සහභාගී වී සිටියා.