අද සිට ජූනි 30 දක්වා දිවයින පුරා මත්පැන්සල් වැසේ.. අනුරාධපුරයේ කොට්ඨාශ 4කට සතියක 'තද' නියෝගයක්..|Hiru TV Blog

අද සිට ජූනි 30 දක්වා දිවයින පුරා මත්පැන්සල් වැසේ.. අනුරාධපුරයේ කොට්ඨාශ 4කට සතියක 'තද' නියෝගයක්..

Sunday, 28 June 2026 - 17:15 | Views - 165

පොසොන් පුර පසළොස්වක පොහෝ දිනය සහ රාජ්‍ය පොසොන් උත්සවය නිමිත්තෙන් දිවයින පුරා පිහිටි සියලුම මත්පැන්සල් වසා තැබීමට පියවර ගෙන ඇති බව සුරාබදු කොමසාරිස් ජනරාල් එම්.ජේ.එන්.ඒ. ප්‍රේමරත්න නිවේදනය කරනවා.

ඒ අනුව හෙට (29) වැනිදාට යෙදෙන පොසොන් පොහොය නිමිත්තෙන්, අද (28) මත්පැන්සල් වසනු ලබන වේලාවේ සිට ලබන (30) දින නැවත විවෘත කිරීමට නියමිත වේලාව දක්වා දිවයින පුරා පිහිටි සියලුම සිල්ලරට මත්පැන් විකිණීමේ සුරාබදු බලපත්‍රලත් ස්ථාන වසා තැබිය යුතුයි.

මේ අතර රාජ්‍ය පොසොන් උත්සවයට සමගාමීව අනුරාධපුර පූජා නගරය කේන්ද්‍ර කරගනිමින් ප්‍රකාශයට පත් කර ඇති පොසොන් සතිය වෙනුවෙන් විශේෂ නියෝගයක්ද පනවා තිබෙනවා.

ඒ අනුව ජූනි (26) සිට ජූලි මස (02) දක්වා ක්‍රියාත්මක වන පරිදි මිහින්තලේ, මධ්‍යම නුවරගම් පළාත, නැගෙනහිර නුවරගම් පළාත සහ මහවිලච්චිය යන ප්‍රාදේශීය ලේකම් කොට්ඨාශ 04 තුළ පිහිටි සියලුම මත්පැන්සල් වසා තැබීමට සුරාබදු කොමසාරිස් ජනරාල්වරයා නියෝග කර තිබෙනවා.

මෙම ප්‍රාදේශීය ලේකම් කොට්ඨාශ 04 හි සියලුම මත්පැන් බලපත්‍රලත් ස්ථාන ජූනි මස 25 වන දින මත්පැන්හල් වසනු ලැබූ වේලාවේ සිට නැවත ජූලි මස 03 වන දින විවෘත කිරීමට නියමිත වේලාව දක්වා අඛණ්ඩව වසා තැබිය යුතු බවද සඳහන්.

මෙම නියමිත දිනයන්හිදී බලපත්‍ර කොන්දේසි කඩකරමින් හොර රහසේ මත්පැන් අලෙවි කරන ස්ථාන වැටලීම සඳහා දිවයිනේ සියලුම සුරාබදු ස්ථානාධිපතිවරුන් වෙත දැඩි උපදෙස් ලබාදී තිබෙනවා.

කිසියම් ස්ථානයක් මෙම නීති උල්ලංඝනය කරන්නේ නම්, ඒ පිළිබඳ තොරතුරු පැය 24 පුරා ක්‍රියාත්මක 1913 සුරාබදු කෙටි දුරකථන අංකය ඔස්සේ දැනුම් දිය හැකියි.