දිවයින පුරා දන්සල් ලියාපදිංචියේ ලොකු වෙනසක්.. පවතින වසංගත තත්ත්වය හමුවේ PHI සංගමය කළ දැඩි අනතුරු ඇඟවීම.|Hiru TV Blog

දිවයින පුරා දන්සල් ලියාපදිංචියේ ලොකු වෙනසක්.. පවතින වසංගත තත්ත්වය හමුවේ PHI සංගමය කළ දැඩි අනතුරු ඇඟවීම.

Saturday, 27 June 2026 - 14:35 | Views - 204

පොසොන් පොහොය නිමිත්තෙන් දිවයින පුරා දන්සල් විශාල ප්‍රමාණයක් ලියාපදිංචි වී ඇතැයි ශ්‍රී ලංකා මහජන සෞඛ්‍ය පරීක්ෂකවරුන්ගේ සංගමයේ වැඩබලන සභාපති උපුල් රෝහණ පවසනවා.

වෙසක් පොහොයට සාපේක්ෂව මෙවර දන්සල් විශාල ප්‍රමාණයක් ලියාපදිංචි වී ඇති බවත් ඉන් වැඩිම දන්සල් ප්‍රමාණයක් ලියාපදිංචි වී ඇත්තේ උතුරු මැද පළාතෙන් බව‍ ඔහු සඳහන් කළා.

දන්සල් ලබා දීමේදී ප්ලාස්ටික් සහ පොලිතින් භාවිතයෙන් වැළකී සිටීම වැදගත් බවද ඔහු අවධාරණය කළා.ප්ලාස්ටික් භාජනවල උණුසුම් පානයන් සහ ආහාර ලබා දීම සම්බන්ධයෙන් විශේෂ පරීක්ෂා කිරීම් සිදුකරන බවයි ඔහු පැවසුවා.

උණුසුම් සහ සිසිල් ආහාර පොලිතින් තුළ ගබඩා කිරීම සෞඛ්‍යමය වශයෙන් ඉතා අවදානම් සහගත බවද ඔහු පෙන්වා දුන්නා.

මේ අතර පවතින ඩෙංගු අධි වසංගත තත්ත්වය හමුවේ දන්සල් සඳහා පොලිතින් සහ ප්ලාස්ටික් භාවිතය ඍජු බලපෑමක් එල්ල කළ හැකි බවටද ඔහු අනතුරු අඟවනවා.

මේ පිළිබඳව අදහස් දක්වන උපුල් රෝහණ,

"අපි කලින් අවස්ථාවලදි දැකලා තියෙනවා විශේෂයෙන් කෝපි දන්සල් සහ බීම දන්සල් වැනි පාන වර්ග ලබා දීමේදී භාවිතා කරන කප් හැමතැනම විසිරෙන ආකාරයට බැහැර කරනවා. ඒ නිසා අපි ඒ ගැන විශේෂ අවධානය යොමු කරන්න කියලා ඉල්ලනවා. මොකද මේ විසිරෙන භාජනවලින් ඩෙංගු මදුරුවන් ඇතිවීමේ අවධානමක් තියෙනවා".

Share This Article