ලෝක ඉතිහාසයේ කළු පැල්ලමකට වසර 37ක් සපිරෙද්දී අමෙරිකාවෙන් චීනයට දැඩි ප්‍රහාරයක්.. රාජ්‍ය ලේකම් මාර්කෝ රූබියෝ නිකුත් කළ විශේෂ නිවේදනය මෙන්න..|Hiru TV Blog

ලෝක ඉතිහාසයේ කළු පැල්ලමකට වසර 37ක් සපිරෙද්දී අමෙරිකාවෙන් චීනයට දැඩි ප්‍රහාරයක්.. රාජ්‍ය ලේකම් මාර්කෝ රූබියෝ නිකුත් කළ විශේෂ නිවේදනය මෙන්න..

Sunday, 07 June 2026 - 20:58 | Views - 143

ලෝක දේශපාලන කරළිය උණුසුම් කරමින්, අතීතයේ සිදුවූ අතිශය බිහිසුණු මෙන්ම ලේ වැකි හමුදා මර්දනයක මතකයන් මුල් කරගෙන අමෙරිකා එක්සත් ජනපදය විසින් චීනය වෙත සෘජු හා දැඩි චෝදනාවක් එල්ල කර තිබෙනවා.

ජූනි 4 වැනිදාට යෙදුණු මෙම ඓතිහාසික සිදුවීමේ සංවත්සරය නිමිත්තෙන් අමෙරිකානු රාජ්‍ය ලේකම් මාර්කෝ රූබියෝ විසින් නිකුත් කරන ලද විශේෂ නිල ප්‍රකාශයත් සමඟ සුපිරි බලවතුන් දෙදෙනා අතර රාජ්‍යතාන්ත්‍රික සබඳතාවල අලුත් උණුසුමක් නිර්මාණය වී ඇති බව විදෙස් වාර්තා සනාථ කළා.

එරට ඉතිහාසයේ සිදුවූ එම මහා මිනිස් ඝාතනයේ මතකයන් වාරණය කිරීමට හා සමාජයෙන් මුළුමනින්ම තුරන් කිරීමට චීන රජය දරන උත්සාහය දැඩි පිළිකුලෙන් යුතුව හෙළා දකින බව රාජ්‍ය ලේකම් මාර්කෝ රූබියෝ චීන පාලනාධිකාරියට සෘජු පණිවිඩයක් නිකුත් කරමින් කියා සිටියා.

1989 වසරේදී බීජිං නුවර සිදුවූ එම මිලේච්ඡ හමුදා මර්දනයට වසර 37ක් සපිරෙන මෙම මොහොතේ, චීන කොමියුනිස්ට් පක්ෂය විසින් එදා සාමකාමීව විරෝධතාවයේ නිරත වූ දහස් සංඛ්‍යාත ජනතාවට ප්‍රහාර එල්ල කරන ලෙස තම සන්නද්ධ හමුදාවන්ට දුන් මාරාන්තික නියෝගය ඔහු නැවතත් ලෝකය හමුවේ මතක් කර දුන්නා.

එදා දේශපාලන ප්‍රතිසංස්කරණ, මූලික අයිතිවාසිකම් සහ දූෂණයට එරෙහිව වගවීමක් ඉල්ලා සාමකාමීව වීදි බැස සිටි අහිංසක චීන ශිෂ්‍යයන්, කම්කරුවන් සහ සාමාන්‍ය වැසියන් වෙනුවෙන් කවදා හෝ දවසක සාධාරණය ඉටුවනු ඇති බව ඇම්නෙස්ටි ඉන්ටර්නැෂනල් ජාත්‍යන්තර මානව හිමිකම් සංවිධානයේ දත්ත වාර්තා පෙන්වා දෙමින් අමෙරිකානු රාජ්‍ය ලේකම්වරයා වැඩිදුරටත් අවධාරණය කළා.

අදහස් ප්‍රකාශ කිරීමේ නිදහස වෙනුවෙන් ජීවිත පූජා කළ ඒ දහස් ගණනකගේ පරිත්‍යාගය ලෝක ඉතිහාසයෙන් කිසිලෙසකවත් මැකී නොයන බව ද ඔහු පැවසුවා.