වයඹ හා මධ්‍යම පළාත් හොල්ලන්න දක්ෂයන් රැසක් එකම තැනකට රැස්වෙයි.. 55 වැනි ජෝන් ටාබට් කනිෂ්ඨ මලල ක්‍රීඩා උළෙල අදත්..|Hiru TV Blog

වයඹ හා මධ්‍යම පළාත් හොල්ලන්න දක්ෂයන් රැසක් එකම තැනකට රැස්වෙයි.. 55 වැනි ජෝන් ටාබට් කනිෂ්ඨ මලල ක්‍රීඩා උළෙල අදත්..

Saturday, 06 June 2026 - 9:03 | Views - 90

ශ්‍රී ලංකාවේ පාසල් ක්‍රීඩා ක්ෂේත්‍රය උඩුයටිකුරු කරමින්, මෙරට බිහිවන අනාගත ශූර ශූරියන් වෙනුවෙන් සංවිධානය කරනු ලබන 55 වැනි ජෝන් ටාබට් කනිෂ්ඨ මලල ක්‍රීඩා තරගාවලියේ තීරණාත්මක අදියරක් ඊයේ (05) දින ඉතාමත් සාර්ථක අයුරින් ආරම්භ කර තිබෙනවා.

හිරු මාධ්‍ය ජාලයේ පූර්ණ අනුග්‍රාහකත්වය හා මාධ්‍ය දායකත්වය යටතේ ක්‍රියාත්මක වන මෙම දැවැන්ත ක්‍රීඩා මංගල්‍යය අද (06) දිනයේදී ද වෙන්නප්පුව මහජන ක්‍රීඩාංගණයේදී ඉතාමත් උද්යෝගිමත් අයුරින් පැවැත්වීමට නියමිතයි.

අධ්‍යාපන අමාත්‍යාංශයේ පූර්ණ අනුමැතිය හා අධීක්ෂණය යටතේ ශ්‍රී ලංකා පාසල් මළල ක්‍රීඩා සංගමය විසින් සංවිධානය කරනු ලබන මෙම තරගාවලිය තුළ මෙවර වයඹ පළාත් හා මධ්‍යම පළාත් නියෝජනය කරන පාසල් 220 ක ක්‍රීඩක ක්‍රීඩිකාවන් 3,500 කට අධික සංඛ්‍යාවක් එකම පිටියක සිය දක්ෂතා දැක්වීම උදෙසා එක්ව සිටිනවා.

මෙම සුවිශේෂී කලාපීය තරගාවලිය දින තෙදිනක් පුරා වෙන්නප්පුව ක්‍රීඩාංගණයේදී ක්‍රියාත්මක වීමට නියමිතයි.

සමස්ත තරගාවලිය වයස් කාණ්ඩ 4 ක් යටතේ බෙදා දක්වා ඇති අතර, මුළු තරග ඉසව් 42 ක් පුරා ක්‍රීඩක ක්‍රීඩිකාවන් කරට කර සටනක නිරත වීමට නියමිතව තිබෙනවා.

ඊයේ (05) නිමාවට පත්වූ තරගාවලියේ පළමු දිනය තුළදී පමණක් ඉසව් 22 ක තරග සාර්ථකව පවත්වා අවසන් කිරීමට සංවිධායක මණ්ඩලය කටයුතු කළා.

අද හා හෙට යන දිනවලදී ඉතිරි ඉසව්වල ජයග්‍රාහකයන් තේරීමේ තියුණු තරග වට පැවැත්වෙන අතර, වයඹ හා මධ්‍යම පළාත්වලින් සමස්ත ලංකා මට්ටමට තේරී පත්වන අනාගත තරු කවුද යන්න බලාගැනීමට මෙතැනින් සජීවීව එක්විය හැකියි.