මෙරට දරුවන්ගේ සෞඛ්‍ය තත්ත්වය ගැන රටම කම්පා කරවන පුවතක් මෙන්න..|Hiru TV Blog

මෙරට දරුවන්ගේ සෞඛ්‍ය තත්ත්වය ගැන රටම කම්පා කරවන පුවතක් මෙන්න..

Thursday, 04 June 2026 - 15:57 | Views - 104

මෙරට අනාගත පරපුර වන කුඩා දරුවන්ගේ සෞඛ්‍ය සහ වර්ධන මට්ටම් පිළිබඳව අතිශය බරපතළ මෙන්ම දෑස් ඇරිය යුතු තත්ත්වයක් සෞඛ්‍ය අමාත්‍යාංශය විසින් නිල වශයෙන් අනාවරණය කර තිබෙනවා.

මෙම මාසයට යෙදී ඇති සුවිශේෂී ජාතික සෞඛ්‍ය වැඩපිළිවෙළකට සමගාමීව සෞඛ්‍ය ප්‍රවර්ධන කාර්යාංශයේ ඊයේ පැවැති විශේෂ ප්‍රවෘත්ති සාකච්ඡාවකට එක්වෙමින් සෞඛ්‍ය අමාත්‍යාංශයේ ලේකම් විශේෂඥ වෛද්‍ය අනිල් ජාසිංහ විසින් මෙම කනගාටුදායක දත්තයන් ප්‍රකාශයට පත් කළා.

වත්මන් දත්තයන්ට අනුව මෙරට වයස අවුරුදු පහට අඩු දරුවන් පස්දෙනෙකුගෙන් එක් අයෙකුම බරපතළ පෝෂණ ඌණතා ගැටලුවලින් පෙළෙමින් සිටින බව අමාත්‍යාංශ ලේකම්වරයා පෙන්වා දුන්නා.

ආර්ථික හා සමාජීය වටපිටාවන් ද සමඟ දරුවන්ගේ ශාරීරික වර්ධනයට මින් සිදුවන බලපෑම සුළුපටු නොවන බව සෞඛ්‍ය අංශ අවධාරණය කළා.

වයස අවුරුදු පහට අඩු සමස්ත දරුවන්ගේ ජනගහනයෙන් සියයට දහසයයි දශම එකක් (16.1%) වයසට සරිලන බරක් නොමැතිව "අඩු බර" තත්ත්වයෙන් පසුවන බව ඊයේ පැවැති මාධ්‍ය හමුවේදී වෛද්‍ය අනිල් ජාසිංහ වැඩිදුරටත් සංඛ්‍යාත්මක දත්ත ඉදිරිපත් කරමින් කියා සිටියා.

එමෙන්ම තවත් දරුවන් සියයට බින්දුවයි දශම පහයි හතක් (0.57%) වැනි ප්‍රතිශතයක් "අධි බරින්" යුක්තව ද පසුවනවා.

මෙම තත්ත්වය වහාම පාලනය කරමින් දරුවන්ගේ සෞඛ්‍ය සුරක්ෂිත කිරීම වෙනුවෙන් ජාතික පෝෂණ මාසය තුළ දිවයින පුරා විශේෂ ව්‍යාපෘති රැසක් ක්‍රියාත්මක කිරීමට සෞඛ්‍ය අමාත්‍යාංශය පියවර ගෙන තිබෙනවා.