හොරණ බටගොඩින් ඇසෙන ශෝකජනක පුවත.. වැඩිහිටි නිවාසයේ අනතුරෙන් මියගිය ගණන 11 දක්වා ඉහළට..|Hiru TV Blog

හොරණ බටගොඩින් ඇසෙන ශෝකජනක පුවත.. වැඩිහිටි නිවාසයේ අනතුරෙන් මියගිය ගණන 11 දක්වා ඉහළට..

Thursday, 04 June 2026 - 7:37 | Views - 85

හොරණ, බටගොඩ ප්‍රදේශයේ පිහිටි සුවිශේෂී රැකවරණ මධ්‍යස්ථානයක ඊයේ පස්වරුවේ හටගත් මහා ගින්නකින් සිදුවූ ජීවිත හානි සංඛ්‍යාව මේ වන විට 11 දක්වා අවාසනාවන්ත ලෙස ඉහළ ගොස් තිබෙනවා.

හොරණ - බටගොඩ 'සෙනෙහසේ කැදැල්ල මවුපිය සෙවණ' වැඩිහිටි නිවාසයේ සිදු වූ මෙම බිහිසුණු ඛේදවාචකය හේතුවෙන් මුළු රටම දැඩි කම්පනයකට පත්ව තිබෙනවා.

පොලිස් වාර්තාවලට අනුව, මෙම දරුණු ගින්න හටගන්නා අවස්ථාවේදී අදාළ වැඩිහිටි නිවාසය තුළ මව්පියන් හා සේවකයන් ඇතුළු පුද්ගලයින් 69 දෙනෙකු රැඳී සිට තිබෙනවා.

ගින්න පැතිර යාමත් සමඟම හොරණ නගර සභාවේ ගිනි නිවීමේ ඒකකය, පොලිසිය හා ප්‍රදේශවාසීන් වහාම ක්‍රියාත්මක වී ඒකාබද්ධ මෙහෙයුමක් දියත් කරමින් ගින්න මැඩපැවැත්වීමට කටයුතු කළා.

එහිදී ගින්නට මැදිව සිටි පුද්ගලයින් 51 දෙනෙකු ඉතාමත් සූක්ෂ්ම ලෙස බේරා ගැනීමට සහන කණ්ඩායම් සමත් වුණා.

මෙම අනතුරෙන් තුවාල ලැබූ තවත් 07 දෙනෙකු මේ වන විටත් හොරණ මූලික රෝහලේ දැඩි සත්කාර සහ ප්‍රතිකාර ඒකකවල ප්‍රතිකාර ලබමින් සිටිනවා.

සෙනෙහසේ කැදැල්ල වැඩිහිටි නිවාසයේ සිටි මව්පියන්ගෙන් වැඩි පිරිසක් මානසික ආබාධ සහිත පුද්ගලයින් වීම හේතුවෙන්, ගින්න හටගත් අවස්ථාවේදී ඔවුන්ව කඩිනමින් ඉවත් කරගැනීමට දැඩි බාධා එල්ල වී තිබෙනවා.

මෙම මහා විනාශකාරී ගින්න ඇතිවීමට නිශ්චිත හේතුව මෙතෙක් අනාවරණය වී නොමැති අතර, ඒ පිළිබඳ විද්‍යාත්මක සාක්ෂි සෙවීම සඳහා රජයේ රස පරීක්ෂක නිලධාරීන් අද (04) එම ස්ථානයට පැමිණ විශේෂ විමර්ශන සිදු කිරීමට නියමිතයි.