කෝවිල් ඉඩම පිරිසිදු කරන්න ගිය තරුණයාට අත්වූ අවාසනාවන්ත ඉරණම.. කනගරායන්කුලම් ප්‍රදේශයෙන් ඇසෙන සංවේදී පුවතක්..|Hiru TV Blog

කෝවිල් ඉඩම පිරිසිදු කරන්න ගිය තරුණයාට අත්වූ අවාසනාවන්ත ඉරණම.. කනගරායන්කුලම් ප්‍රදේශයෙන් ඇසෙන සංවේදී පුවතක්..

Wednesday, 03 June 2026 - 13:40 | Views - 91

කනගරායන්කුලම්, කුරුසුට්ටුකුලම් ප්‍රදේශයෙන් ඉතාමත් සෝචනීය හා අවාසනාවන්ත පුවතක් වාර්තා වෙනවා.

ඊයේ (ජූනි 02) සවස සිදු වූ අනපේක්ෂිත අනතුරකින් කුරුසුට්ටුකුලම් ප්‍රදේශයේම පදිංචිව සිටි 20 හැවිරිදි වියේ පසුවන තරුණයෙකු අවාසනාවන්ත ලෙස ජීවිතක්ෂයට පත්ව ඇති බව කනගරායන්කුලම් පොලිසිය පවසනවා.

මරණකරු විසින් කුරුසුට්ටුකුලම් කෝවිල පිහිටි ඉඩම පිරිසිදු කිරීම සඳහා ට්‍රැක්ටර් රථය පණගැන්වීමට උත්සාහ කර ඇති බව පොලිසිය විසින් සිදු කරන ලද මූලික විමර්ශනවලදී අනාවරණය වී තිබෙනවා.

එම අවස්ථාවේදී රථයේ හටගත් හදිසි කාර්මික දෝෂයක් හේතුවෙන් ඔහු විසින් එය එසැණින් අළුත්වැඩියා කිරීමට කටයුතු කර තිබෙනවා.

එලෙස ට්‍රැක්ටර් රථය අළුත්වැඩියා කරමින් සිටියදී, එය එක්වරම ක්‍රියාත්මක වී ඉදිරියට ධාවනය වී තිබෙනවා.

එහිදී කිසිවෙකුත් බලාපොරොත්තු නොවූ පරිදි එම තරුණයා රථයේ රෝදයකට යටවීමෙන් මෙම බරපතළ අනතුර සිදුව ඇති බව පොලිසිය සඳහන් කළා.

අනතුරින් බරපතළ තුවාල ලැබූ තරුණයා වහාම පුලියන්කුලම රෝහල වෙත ඇතුළත් කිරීමට පියවර ගත්තද, ඒ වන විටත් ඔහු ජීවිතක්ෂයට පත්ව සිටියා.

ලද පණිවිඩයක් මත කනගරායන්කුලම් පොලිස් ස්ථානයේ නිලධාරීන් කණ්ඩායමක් මේ වනවිට සිද්ධිය සම්බන්ධයෙන් වැඩිදුර විමර්ශන කටයුතු ආරම්භ කර තිබෙනවා.

Share This Article