අනුරාධපුර අටමස්ථානයේ පරිපාලනයේ වෙනසක්.. අටමස්ථානාධිපති ධුරයේ වැඩ බැලීමට ඊතලවැටුණුවැවේ ඥානතිලක හිමියන් පත් කෙරේ.|Hiru TV Blog

අනුරාධපුර අටමස්ථානයේ පරිපාලනයේ වෙනසක්.. අටමස්ථානාධිපති ධුරයේ වැඩ බැලීමට ඊතලවැටුණුවැවේ ඥානතිලක හිමියන් පත් කෙරේ.

Saturday, 30 May 2026 - 16:29 | Views - 78

ශාසනික වශයෙන් අතිශය වැදගත් වන සුවිශේෂී තීරණ කිහිපයක් මල්වතු මහා විහාරීය කාරක මහා සංඝ සභාව විසින් ගෙන තිබෙනවා.

ඒ අනුව, මල්වතු මහා විහාර පාර්ශ්වයේ නුවර කලාවියේ ප්‍රධාන සංඝනායක පදවිය හා අටමස්ථානාධිපති ධුරය සම්බන්ධයෙන් මෙම විශේෂ නියෝගයන් නිකුත් කර ඇති බව වාර්තා වුණා.

වත්මන් අටමස්ථානාධිපති, පූජ්‍ය පල්ලේගම හේමරතන නායක ස්වාමීන් වහන්සේ සම්බන්ධයෙන් එල්ල වී ඇති ආන්දෝලනාත්මක චෝදනාවන් පිළිබඳව අවධානය යොමු කරමින්, මල්වතු මහා විහාරීය කාරක මහා සංඝ සභාව විසින් මීට පෙර අදාළ පාර්ශ්වයන් කැඳවා දීර්ඝ වශයෙන් කරුණු විභාග කර තිබුණා.

ඒ අනුව අද (30) දින රැස් වූ කාරක මහා සංඝ සභාව විසින් තීරණය කර ඇත්තේ, පල්ලේගම හේමරතන ස්වාමීන් වහන්සේට එල්ල වී ඇති චෝදනාව සම්බන්ධයෙන් පවතින අධිකරණ කටයුතු අවසන් වී ස්ථිර තීන්දුවක් ලැබෙන තෙක්, උන්වහන්සේ දැරූ නුවර කලාවියේ ප්‍රධාන සංඝනායක පදවිය වහාම ක්‍රියාත්මක වන පරිදි අත්හිටුවීමටයි.

මල්වතු මහාවිහාරීය කාරක සංඝ සභාවේ මෙම නිල නියමය පරිදි, අටමස්ථාන කමිටුව විසින් රුවන්වැලි චෛත්‍යාරාමාධිකාරී පූජ්‍ය ඊතලවැටුණුවැවේ ඥානතිලක හිමියන්ව තාවකාලිකව අටමස්ථානාධිපති ධුරයේ කටයුතු ආවරණය කිරීම (වැඩ බැලීම) සඳහා පත්කර තිබෙනවා.

ඒ අනුව ඉදිරි ආගමික හා පරිපාලන කටයුතු උන්වහන්සේගේ මූලිකත්වයෙන් සිදු වීමට නියමිතයි.