නාවික හා ධීවර ප්‍රජාවට විශේෂ දැනුම්දීමක්.. දිවයින වටා මුහුදු තීරයේ පවතින වත්මන් තත්ත්වය මෙන්න.|Hiru TV Blog

නාවික හා ධීවර ප්‍රජාවට විශේෂ දැනුම්දීමක්.. දිවයින වටා මුහුදු තීරයේ පවතින වත්මන් තත්ත්වය මෙන්න.

Wednesday, 27 May 2026 - 9:13 | Views - 81

දිවයින වටා මුහුදු ප්‍රදේශවල මුහුද අතිශයින් රළු විය හැකි බවත්, ඇතැම් වෙරළාශ්‍රිත ප්‍රදේශවලට මුහුදු රළ ගොඩබිමට ගැලීමේ අවදානමක් පවතින බවත් කාලගුණ විද්‍යා දෙපාර්තමේන්තුව නිවේදනය කරනවා.

පවතින මෙම අවදානම් තත්ත්වය හේතුවෙන් නාවික සහ ධීවර ප්‍රජාව මේ සම්බන්ධයෙන් දැඩි අවධානයෙන් පසුවිය යුතු බව එම දෙපාර්තමේන්තුව අවධාරණය කළා.

කාලගුණ විද්‍යා දෙපාර්තමේන්තුව නිකුත් කළ නවතම නිවේදනයට අනුව, කන්කසන්තුරය සිට මන්නාරම හරහා හලාවත දක්වා වන මුහුදු ප්‍රදේශ මෙන්ම මාතර සිට හම්බන්තොට හරහා පොතුවිල් දක්වා වන මුහුදු ප්‍රදේශ රළු විය හැකි බව පෙන්වා දී තිබෙනවා.

එමෙන්ම, එම මුහුදු ප්‍රදේශවල විටින් විට පැයට කිලෝමීටර 60 දක්වා වන තද ප්‍රහාරාත්මක සුළං ඇති වියහැකි බව වාර්තා වෙනවා.

මේ අතර, කල්පිටිය සිට කොළඹ හා ගාල්ල හරහා මාතර දක්වා වන වෙරළට ආසන්න මුහුදු ප්‍රදේශවල, මුහුදු රළ ගොඩබිමට ගැලීමේ වැඩි හැකියාවක් පවතිනවා.

මේ හේතුවෙන් එම වෙරළාශ්‍රිත ප්‍රදේශවල ජීවත්වන ජනතාවද දැඩි අවධානයෙන් හා සුපරීක්ෂාකාරීව සිටින ලෙස කාලගුණ විද්‍යා දෙපාර්තමේන්තුව දැනුම් දුන්නා.

අපදා කළමනාකරණ අංශ ද වෙරළබඩ කලාපයේ පවතින තත්ත්වය පිළිබඳව මේ වන විටත් නිරන්තර අවධානයෙන් සිටිනවා.