කැළණි ගඟ ද්රෝණියට මහා වැසි ඇදහැලෙයි. ඒ අවට පහත් බිම්වලට සුළු ගංවතුර අවදානමක්..
කැළණි ගඟ ද්රෝණියේ ඉහළ ධාරා ප්රදේශවලට මිලිමීටර් 300 කට ආසන්න අධික වර්ෂාපතනයක් ලැබීම හේතුවෙන් හංවැල්ලට පහළින් පිහිටි පහත් බිම් රැසකට ඉදිරි පැය 48 තුළ සුළු ගංවතුර තත්ත්වයක් ඇති විය හැකි බව වාරිමාර්ග දෙපාර්තමේන්තුව අනතුරු අඟවනවා.
කැළණි ගඟ පිටාර ගැලීම හේතුවෙන් සීතාවක, දොම්පේ, පාදුක්ක, හෝමාගම, බියගම, කඩුවෙල, කොලොන්නාව, කැලණිය, වත්තල හා කොළඹ යන ප්රාදේශීය ලේකම් කොට්ඨාසවල පහත් බිම් මෙලෙස ගංවතුර අවදානමට ලක්විය හැකි බව එම දෙපාර්තමේන්තුව පෙන්වා දී තිබෙනවා.
මේ හේතුවෙන් ඉහත සඳහන් කළ ප්රදේශවල ගඟ දෙපස හා පහත් බිම්වල ජීවත්වන ජනතාව මෙන්ම එම ප්රදේශ හරහා ධාවනය වන වාහන පදවන්නන් ද දැඩි අවධානයෙන් හා සුපරීක්ෂාකාරීව කටයුතු කළ යුතු බව වාරිමාර්ග දෙපාර්තමේන්තුව දැනුම් දුන්නා.
පවතින අවදානම් තත්ත්වය හමුවේ ආරක්ෂිත පියවර ගනිමින් කටයුතු කරන ලෙසයි ඔවුන් මහජනතාවගෙන් ඉල්ලා සිටින්නේ. පීඩාවට පත් විය හැකි පිරිස් වෙනුවෙන් සහන සේවා සැපයීමට අදාළ අංශ මේ වන විටත් සූදානමින් සිටිනවා.