මොරගල්ල වෙරළට ගොඩගැසූ දේ නිසා ප්‍රදේශයම කැළඹෙයි. අලුත්ගම පොලිසියෙන් හදිසි පරීක්ෂණ‍යක්..|Hiru TV Blog

මොරගල්ල වෙරළට ගොඩගැසූ දේ නිසා ප්‍රදේශයම කැළඹෙයි. අලුත්ගම පොලිසියෙන් හදිසි පරීක්ෂණ‍යක්..

Saturday, 23 May 2026 - 11:34 | Views - 74

අලුත්ගම හා බේරුවල ප්‍රසිද්ධ සංචාරක කලාපයේ වෙසෙන සමස්ත මහජනතාව මෙන්ම විදේශීය සංචාරකයන් ද අතිශය කම්පනයට මෙන්ම භීතියට පත් කරන බිහිසුණු පුවතක් අද (23) උදෑසන කාලයේදී වාර්තා කර තිබෙනවා.

ඒ අනුව, අලුත්ගම මොරගල්ල ප්‍රදේශයේ පිහිටි ප්‍රමුඛ පෙළේ සුඛෝපභෝගී සංචාරක හෝටලයකට පිටුපසින් වූ වෙරළ තීරයට පුද්ගලයෙකුගේ ශරීරයෙන් වෙන් වූ හිස කොටසක් පමණක් අභිරහස් ලෙස ගොඩගසා තිබෙනවා.

වෙරළේ තිබූ මේ බිහිසුණු මිනිස් සිරුරු කොටස දුටු අයෙකු විසින් අද උදෑසන කාලයේදී වහාම ක්‍රියාත්මක වී අලුත්ගම පොලිස් ස්ථානය වෙත දුරකථන ඇමතුමකින් මේ පිළිබඳව දැනුම් දී තිබුණා.

ලද තොරතුරට අනුව වහාම ක්‍රියාත්මක වූ අලුත්ගම පොලිස් ස්ථානයේ විශේෂ නිලධාරීන් කණ්ඩායමක් මොරගල්ල වෙරළ තීරයේ අදාළ ස්ථානය වෙත ළඟා වී මෙම හිස කොටස පොලිස් භාරයට ගැනීමට කටයුතු කළා.

ප්‍රධාන පෙළේ සංචාරක හෝටලයක් පිටුපස වෙරළ සීමාවේ මෙම දසුන දැකගන්නට ලැබීමත් සමඟ ප්‍රදේශයේ දැඩි නොසන්සුන් සහ කුතුහලයක් සහිත තත්ත්වයක් ද හටගෙන තිබෙනවා.

කෙසේ වෙතත්, මෙලෙස අවාසනාවන්ත ලෙස මියගොස් හෝ ඝාතනයට ලක්ව ඇති පුද්ගලයා කවුද, ඔහු කුමන ප්‍රදේශයක පදිංචිකරුවෙක්ද නැතහොත් විදේශීය සංචාරකයෙක්ද යන්න සම්බන්ධයෙන් මෙතෙක් කිසිදු නිල තොරතුරක් අනාවරණය කර ගැනීමට පොලිසියට හැකි වී නැහැ.

මෙය දරුණු ඝාතනයක් සිදුකර සාක්ෂි සැඟවීම සඳහා සිරුරේ කොටස් මුහුදට දැමීමෙන් පසු මෙලෙස වෙරළට ගොඩගැසුවේද, නැතහොත් මුහුදේ ගිලීමෙන් සිදු වූ අනතුරක් ද යන්න පිළිබඳව විද්‍යාත්මක සහ වෛද්‍ය පරීක්ෂණ පැවැත්වීමට නියමිතයි.

හමුවූ හිස කොටස ඉදිරි නීතිමය පියවර සහ පශ්චාත් මරණ පරීක්ෂණ කටයුතු සඳහා රෝහල් මෘත ශරීරාගාරය වෙත යොමු කිරීමට කටයුතු යොදා ඇති අතර, අලුත්ගම පොලිස් ස්ථානයේ ස්ථානාධිපතිවරයාගේ සෘජු අධීක්ෂණය යටතේ මේ පිළිබඳව පුළුල් හා වැඩිදුර විමර්ශන ක්‍රියාත්මක කර ඇති බව නිල වශයෙන් තහවුරු කර තිබෙනවා.