ගංවතුර හා නායයෑම් අවදානම තවත් දරුණු වෙයි.. අත්තනගලු ඔය ද්‍රෝණියේ ගංවතුර අනතුරු ඇඟවීම දීර්ඝ වෙයි..|Hiru TV Blog

ගංවතුර හා නායයෑම් අවදානම තවත් දරුණු වෙයි.. අත්තනගලු ඔය ද්‍රෝණියේ ගංවතුර අනතුරු ඇඟවීම දීර්ඝ වෙයි..

Saturday, 23 May 2026 - 11:00 | Views - 70

දිවයින පුරා පවතින දරුණු අයහපත් කාලගුණික වටපිටාව තවදුරටත් වර්ධනය වෙමින් පවතින පසුබිමක, ගම්පහ හා ඒ අවට වෙසෙන ජනතාව මුහුණ දෙන ගංවතුර අවදානම මෙන්ම කඳුකර දිස්ත්‍රික්කවල පවතින නායයෑම් අවදානම ද තවදුරටත් දීර්ඝ කිරීමට ආපදා කළමනාකරණ අංශ පියවර ගෙන තිබෙනවා.

ඒ අනුව අත්තනගලු ඔය ද්‍රෝණිය සඳහා නිකුත් කළ ගංවතුර අනතුරු ඇඟවීම ඉදිරි පැය 48 සඳහා දීර්ඝ කරන බව වාරිමාර්ග දෙපාර්තමේන්තුව සඳහන් කරනවා.

තවද, කෑගල්ල දිස්ත්‍රික්කයේ දැරණියගල, රුවන්වැල්ල සහ දෙහිඕවිට මෙන්ම රත්නපුර දිස්ත්‍රික්කයේ රත්නපුර, අයගම, කුරුවිට හා ඇහැලියගොඩ යන ප්‍රාදේශීය ලේකම් කොට්ඨාසවලට නිකුත් කළ නායයෑමේ රතු නිවේදනය තවදුරටත් බලාත්මකයි.

එමෙන්ම ගම්පහ දිස්ත්‍රික්කයේ අත්තනගල්ල, කළුතර දිස්ත්‍රික්කයේ බුලත්සිංහල, හොරණ, ඉංගිරිය හා පාලින්දනුවර, කෑගල්ල දිස්ත්‍රික්කයේ යටියන්තොට හා රත්නපුර දිස්ත්‍රික්කයේ පැල්මඩුල්ල, කිරිඇල්ල, ඇලපාත, කලවාන හා නිවිතිගල යන ප‍‍්‍රාදේශීය ලේකම් කොට්ඨාස සඳහා දෙවන මට්ටමේ නායයාමේ අනතුරු ඇඟවීම් නිවේදනය තවදුරටත් ක්‍රියාත්මක බව ජාතික ගොඩනැගිලි පර්යේෂණ ආයතනය සඳහන් කළා.

පවතින අධික වර්ෂාපතනය හේතුවෙන් පස් කඳුවල පැලීම්, එකවර උල්පත් ජලය බොර වීම වැනි ලක්ෂණ දුටු වහාම ළඟම ඇති පොලිස් ස්ථානය හෝ ආපදා සහන අංශ දැනුවත් කරන ලෙස බලධාරීන් මහජනතාවගෙන් කාරුණිකව ඉල්ලා සිටින බව තහවුරු කර තිබෙනවා.