නිරිත දිග මෝසම් වැසි ඇරඹෙයි.. අද පස්වරු 2.00න් පසු ප්‍රදේශ රැසකට තද වැසි හා සුළං..|Hiru TV Blog

නිරිත දිග මෝසම් වැසි ඇරඹෙයි.. අද පස්වරු 2.00න් පසු ප්‍රදේශ රැසකට තද වැසි හා සුළං..

Wednesday, 20 May 2026 - 10:11 | Views - 74

ශ්‍රී ලංකාව හරහා නිරිත දිග මෝසම් කාලගුණ තත්ත්වය ක්‍රමයෙන් ස්ථාපිත වෙමින් පවතින බව කාලගුණ විද්‍යා දෙපාර්තමේන්තුව අද (20) උදෑසන නිකුත් කළ නවතම නිවේදනයක සඳහන් කර තිබෙනවා.

මේ හේතුවෙන් දිවයිනේ පළාත් හා දිස්ත්‍රික්ක රැසකට විටින් විට වැසි හෝ ගිගුරුම් සහිත වැසි ඇතිවීමේ ඉහළ සම්භාවිතාවක් පවතිනවා.

කාලගුණ වාර්තාවලට අනුව බස්නාහිර, සබරගමුව හා වයඹ පළාත්වලත් ගාල්ල, මාතර, මහනුවර හා නුවරඑළිය දිස්ත්‍රික්කවලත් අද දිනයේ විටින් විට වැසි ඇතිවිය හැකියි.

ඇතැම් ස්ථානවලට මිලිමීටර් 50 ඉක්මවූ තරමක තද වැසි ඇතිවිය හැකි බව එම දෙපාර්තමේන්තුව පෙන්වා දුන්නා.

මීට අමතරව උතුරු පළාතේත්, අනුරාධපුර හා හම්බන්තොට දිස්ත්‍රික්කවලත් වැසි වාර කිහිපයක් ඇතිවිය හැකි බව සඳහන් කළා.

මේ අතර ඌව පළාතටත්, මඩකලපුව හා අම්පාර දිස්ත්‍රික්කවලටත් අද පස්වරු 2.00න් පසුව ස්ථාන ස්වල්පයක වැසි හෝ ගිගුරුම් සහිත වැසි ඇතිවීමේ හැකියාවක් පවතිනවා.

මීට සමගාමීව මධ්‍යම කඳුකරයේ බටහිර බෑවුම් ප්‍රදේශවලත්, උතුරු, උතුරු-මැද, වයඹ සහ දකුණු පළාත්වලත් විටින් විට හමන පැයට කිලෝමීටර් 30ත් 40ත් අතර තරමක තද සුළං ඇතිවිය හැකි බව ද වාර්තා වුණා.

ගිගුරුම් සහිත වැසි ඇතිවන අවස්ථාවලදී එම ප්‍රදේශවල තාවකාලිකව තද සුළං ඇතිවිය හැකි අතර, අකුණු මඟින් සිදුවන අනතුරු අවම කර ගැනීමට අවශ්‍ය පියවර ගන්නා ලෙස කාලගුණ විද්‍යා දෙපාර්තමේන්තුව මහජනතාවගෙන් කාරුණිකව ඉල්ලා සිටිනවා.

විශේෂයෙන්ම විවෘත ස්ථානවල රැඳී සිටීමෙන් වැළකීම, විදුලි උපකරණ භාවිතයේදී සැලකිලිමත් වීම හා ගස් කඩා වැටීමේ අවදානම පිළිබඳව අවධානයෙන් පසුවන ලෙසද සෞඛ්‍ය හා ආරක්ෂක අංශ මහජනතාව දැනුවත් කර තිබෙනවා.