වර්ෂාවෙන් වගා හානිවූ ගොවීන්ට සහනයක්.. වන්දි මුදල් හිමිවන බෝග වර්ග 6ක් මෙන්න.|Hiru TV Blog

වර්ෂාවෙන් වගා හානිවූ ගොවීන්ට සහනයක්.. වන්දි මුදල් හිමිවන බෝග වර්ග 6ක් මෙන්න.

Tuesday, 19 May 2026 - 10:31 | Views - 62

පසුගිය දිනවල දිවයිනේ ප්‍රදේශ රැසකට ඇද හැළුණු අධික වර්ෂාව හේතුවෙන් යල කන්නයේ සිදුවූ වගා හානි සඳහා ගොවි ජනතාවට හෙක්ටයාරයකට රුපියල් ලක්ෂයක උපරිමයක් දක්වා වන්දි ලබාදීමට පියවර ගන්නා බව කෘෂිකාර්මික හා ගොවිජන රක්ෂණ මණ්ඩලය (Agrarian Insurance Board) නිල වශයෙන් ප්‍රකාශ කරලා තිබෙනවා.

පවතින අයහපත් කාලගුණය හේතුවෙන් කුඹුරු හා වගාබිම් රැසක් ජලයෙන් යටවීම නිසා ගොවීන් විශාල පිරිසක් පීඩාවට පත්වී තිබෙනවා.

මෙම විශේෂ රක්ෂණ වන්දි ක්‍රමවේදය ප්‍රධාන වශයෙන් බෝග වර්ග 6ක් සඳහා බලපැවැත්වෙන බව රජය තහවුරු කළා.

ඒ අනුව, වී, බඩ ඉරිඟු, අර්තාපල්, සෝයා, මිරිස්, ලොකු ලූනු යන වගාවන් සඳහා මෙම වන්දි මුදල් ප්‍රතිලාභය අදාළ වන බව එම මණ්ඩලය සඳහන් කළා.

අධික වර්ෂාවෙන් තමන්ගේ වගාවන්ට හානි සිදු වූ ගොවීන්, එම වගා හානි පිළිබඳ තොරතුරු ඉදිරි දින 14 ඇතුළත තමන්ට ආසන්නතම ප්‍රාදේශීය ගොවිජන සේවා මධ්‍යස්ථානය වෙත වාර්තා කළ යුතු බව කෘෂිකාර්මික හා ගොවිජන රක්ෂණ මණ්ඩලය විශේෂ නිවේදනයක් නිකුත් කරමින් අවධාරණය කළා.

අදාළ නිලධාරීන් මඟින් වගා හානි පිළිබඳ ක්ෂේත්‍ර පරීක්ෂණ කඩිනමින් සිදු කර, විනිවිදභාවයකින් යුතුව මෙම වන්දි මුදල් ගොවීන්ගේ බැංකු ගිණුම් වෙතම බැර කිරීමට අවශ්‍ය කටයුතු සූදානම් කර ඇති බව ද රජය වැඩිදුරටත් තහවුරු කර තිබෙනවා.