අදත් අහස වලාකුළින් බර වෙයි.. දිස්ත්‍රික්ක රැසකට විටින් විට ගිගුරුම් සහිත වැසි.|Hiru TV Blog

අදත් අහස වලාකුළින් බර වෙයි.. දිස්ත්‍රික්ක රැසකට විටින් විට ගිගුරුම් සහිත වැසි.

Sunday, 17 May 2026 - 10:13 | Views - 82

ශ්‍රී ලංකාවට උතුරු දෙසින් පිහිටා තිබූ අඩු පීඩන කලාපය ක්‍රමයෙන් දුර්වල වෙමින් පවතින බව කාලගුණ විද්‍යා දෙපාර්තමේන්තුව අද (17) උදෑසන නිවේදනය කරලා තිබෙනවා.

කෙසේවෙතත්, මෙම පද්ධතියේ බලපෑම හේතුවෙන් දිවයිනේ ප්‍රදේශ රැසක අහස වලාකුළින් බරව පවතින බව වාර්තා වුණා.

පවතින කාලගුණ තත්ත්වය අනුව බස්නාහිර, සබරගමුව, මධ්‍යම, වයඹ හා උතුරු පළාත්වලත්, ගාල්ල ගා මාතර දිස්ත්‍රික්කවලත් විටින් විට වැසි හෝ ගිගුරුම් සහිත වැසි ඇති විය හැකි බව එම දෙපාර්තමේන්තුව සඳහන් කළා.

මීට අමතරව අනුරාධපුර දිස්ත්‍රික්කයට ද වැසි වාර කිහිපයක් ඇති විය හැකි බවට පුරෝකථනය කර තිබෙනවා.

මේ අතර, ඌව සහ නැගෙනහිර පළාත්වල මෙන්ම පොලොන්නරුව දිස්ත්‍රික්කයේ ද ස්ථාන ස්වල්පයක පස්වරු 1.00 න් පසුව වැසි හෝ ගිගුරුම් සහිත වැසි ඇති වීමේ හැකියාවක් පවතින බව කාලගුණ බලධාරීන් අනාවරණය කළා.

ගිගුරුම් සහිත වැසි ඇති වන අවස්ථාවලදී එම ප්‍රදේශවල තාවකාලිකව තද සුළං ඇති විය හැකි බැවින්, ඒ පිළිබඳව අවධානයෙන් සිටින ලෙස රජය දන්වා සිටිනවා.

එමෙන්ම අකුණු මඟින් සිදුවන අනතුරු අවම කර ගැනීමට අවශ්‍ය පියවර ගන්නා ලෙසයි කාලගුණ විද්‍යා දෙපාර්තමේන්තුව මහජනතාවගෙන් විශේෂයෙන්ම ඉල්ලා සිටියේ.

ආරක්ෂිත පියවර අනුගමනය කරමින් කටයුතු කරන ලෙස ප්‍රාදේශීය ලේකම් කාර්යාල ද ජනතාව දැනුවත් කිරීමට කටයුතු කළා.