දිස්ත්‍රික්ක ‍රැසකට අයහපත් කාලගුණයෙන් බලපෑම්.. ප්‍රවේශමෙන් සිටින්නැයි බලධාරීන්ගෙන් උපදෙස්..|Hiru TV Blog

දිස්ත්‍රික්ක ‍රැසකට අයහපත් කාලගුණයෙන් බලපෑම්.. ප්‍රවේශමෙන් සිටින්නැයි බලධාරීන්ගෙන් උපදෙස්..

Wednesday, 13 May 2026 - 9:01 | Views - 74

දිවයිනේ ප්‍රදේශ රැසකට බලපා ඇති අයහපත් කාලගුණික තත්ත්වය තවදුරටත් උග්‍ර වෙමින් පවතින බව කාලගුණ විද්‍යා දෙපාර්තමේන්තුව පැවසුවා.

බස්නාහිර, සබරගමුව, පුත්තලම, ගාල්ල හා මාතර දිස්ත්‍රික්කවල ඇතැම් ස්ථානවලට මිලිමීටර් 200 ඉක්මවන ඉතා තද වැසි ඇති විය හැකි බවට අනාවැකි පළකරලා තිබෙනවා.

ගතවූ පැය 24 තුළ වැඩිම වර්ෂාපතනය වාර්තා වන්නේ කැස්බෑව පිළියන්දල ප්‍රදේශයෙන් වන අතර එය මිලිමීටර් 204ක් ලෙස සටහන්වුණා.

මීට අමතරව වේයන්ගොඩ, ගිලිමලේ හා වතුපිටිවල ප්‍රදේශවලටද මිලිමීටර් 100 ඉක්මවූ තද වැසි ඇද හැලී තිබෙනවා.

ධාරානිපාත වර්ෂාව හේතුවෙන් බදුල්ල, කළුතර, මහනුවර ඇතුළු දිස්ත්‍රික්ක 8ක් සඳහා නිකුත් කළ නායයෑම් අනතුරු ඇඟවීම් අද පස්වරු 4.00 දක්වා දීර්ඝ කර තිබෙනවා.

මේ අතර කොළඹ, කොටහේන, ආමර් බාබර් හන්දිය ජලයෙන් යටවීම නිසා රථවාහන ගමනාගමනයට ද දැඩි බාධා එල්ල වී ඇති බව පොලිසිය ප්‍රකාශ කළා.

වැසි තත්ත්වය සමඟ ප්‍රබල අකුණු ඇතිවීමේ අවදානමක්ද පවතින බැවින්, එළිමහනේ රැඳී සිටින විට හා විදුලි උපකරණ භාවිතයේදී වඩාත් සැලකිලිමත් වන ලෙස කාලගුණ විද්‍යා දෙපාර්තමේන්තුව ජනතාවගෙන් ඉල්ලා සිටිනවා.