දෙනියායේ පාසල් ගැන නව තීරණයක්.. සෞඛ්‍ය ආරක්ෂාව මැද යළි ඇරඹෙන හැටි මෙන්න.|Hiru TV Blog

දෙනියායේ පාසල් ගැන නව තීරණයක්.. සෞඛ්‍ය ආරක්ෂාව මැද යළි ඇරඹෙන හැටි මෙන්න.

Tuesday, 12 May 2026 - 9:04 | Views - 83

දෙනියාය අධ්‍යාපන කලාපයේ පැතිර ගිය වෛරස් උණ රෝගී තත්ත්වය හේතුවෙන් තාවකාලිකව වසා දැමූ පාසල්, හෙට (13) දින සිට නැවත විවෘත කරන බව දකුණු පළාත් අධ්‍යාපන ලේකම් නිශාන් පතිරණ පැවසුවා.

මැයි 12 වන දින පාසල් විවෘත කිරීමට සැලසුම් කර තිබුණත්, සෞඛ්‍යාරක්ෂිත පියවර විධිමත්ව සම්පූර්ණ කිරීමෙන් අනතුරුව 13 වනදා සිට අධ්‍යයන කටයුතු ආරම්භ කිරීමට බලධාරීන් තීරණය කරලා තිබෙනවා.

පාසල් නැවත ආරම්භ කිරීමට පෙර සිසුන්ගේ සෞඛ්‍ය ආරක්ෂාව උපරිමයෙන් තහවුරු කිරීම සඳහා විශේෂ වැඩපිළිවෙළක් ක්‍රියාත්මක වෙනවා. ඒ යටතේ මැයි 11 හා 12 දෙදින තුළ පාසල් පරිශ්‍රයන් පිරිසිදු කිරීමේ හා විෂබීජහරණය කිරීමේ කටයුතු සිදුකෙරෙනවා.

දරුවන්ට බියකින් තොරව පාසල් ඒමට අවශ්‍ය වටපිටාව සකස් කිරීම මෙහි ප්‍රධාන අරමුණ වී තිබෙනවා.

මේ පිරිසිදු කිරීමේ කටයුතු සඳහා ස්වේච්ඡාවෙන් ඉදිරිපත් වන පිරිස් වෙත බලධාරීන් විවෘත ආරාධනයක් කරනවා. පාසල් හා පෙර පාසල් පිරිසිදු කිරීමට දායක වීමට කැමති ස්වේච්ඡා පුද්ගලයින් හෝ ආයතන වෙතොත්, දෙනියාය කලාප අධ්‍යාපන කාර්යාලය හා සම්බන්ධ වන ලෙස ඔවුන් ඉල්ලා සිටිනවා.

පාසල් බදාදා විවෘත වුවත්, දැනට නිවාඩු ලබාදී ඇති පෙර පාසල් මේ සතිය පුරා තවදුරටත් වසා තැබෙන බව අධ්‍යාපන ලේකම්වරයා වැඩිදුරටත් පවසනවා.

මේ අනුව, දෙනියාය කලාපයේ පාසල් දරුවන්ට ලබන බදාදා සිට සිය අධ්‍යයන කටයුතු සඳහා සුපුරුදු පරිදි සහභාගී වීමට දැන් අවස්ථාව තිබෙනවා.