ලංකාවේ නිවාස තුළ සැඟවී සිටින විදේශීය අපරාධකරුවන්ගේ වැඩිවීමක්.. ගෙවල් කුලියට දෙනකොට බලාගෙනයි|Hiru TV Blog

ලංකාවේ නිවාස තුළ සැඟවී සිටින විදේශීය අපරාධකරුවන්ගේ වැඩිවීමක්.. ගෙවල් කුලියට දෙනකොට බලාගෙනයි

Friday, 08 May 2026 - 16:24 | Views - 141

ශ්‍රී ලංකාවේ රැඳී සිටිමින් විදේශිකයන් පිරිසක් සිදුකරන මහා පරිමාණ පරිගණක හා සයිබර් අපරාධ සංඛ්‍යාව දිනෙන් දින ඉහළ යමින් පවතින බව පොලිස් මාධ්‍ය ප්‍රකාශක, සහකාර පොලිස් අධිකාරී එම්.යූ. වුට්ලර් ඊයේ දිනයේ (07) අනාවරණය කරලා තිබෙනවා.

මේ හේතුවෙන් නිවාස හෝ ගොඩනැගිලි කුලියට දීමේදී අතිශය විචක්ෂණශීලීවන ලෙස ඔහු මහජනතාවගෙන් ඉල්ලා සිටියා.

2024 වසරට වඩා 2025 හා 2026 වසරවලදී මෙරට සයිබර් අපරාධවල කැපී පෙනෙන වර්ධනයක් දක්නට ලැබෙන බව පොලිසිය පෙන්වාදී තිබෙනවා.

මහජනතාව වගකීම් විරහිතව කටයුතු කිරීම නිසා වංචාකරුවන් මෙලෙස මෙරට තුළ සිය ජාලය ව්‍යාප්ත කර ඇතිබව වාර්තා කළා.

2026 ජනවාරි 01 වැනිදා සිට මේ දක්වා කාලය තුළ පමණක් විවිධ වැරදි සම්බන්ධයෙන් විදේශිකයන් 628 දෙනෙකු අත්අඩංගුවට ගැනීමට පොලිසිය පියවරගෙන තිබෙනවා.

අත්අඩංගුවට ගත් පිරිස අතර ඉන්දීය, වියට්නාම, චීන, මියන්මාර්, පිලිපීන හා කාම්බෝජ ජාතිකයන් සිටින බව වාර්තා කළා.

කුරුඳුවත්ත, ගල්කිස්ස, මීගමුව, හලාවත හා පෝද්දල වැනි ප්‍රදේශවලින් මේ සැකකරුවන් වැඩි වශයෙන් අත්අඩංගුවට ගෙන තිබෙනවා.

ඔබේ නිවස, හෝටලය හෝ ගොඩනැගිල්ල විදේශිකයන්ට කුලියට ලබාදෙන්නේ නම් ඒ පිළිබඳව වහාම ප්‍රදේශයේ පොලිසිය දැනුවත් කරන ලෙස උපදෙස්දී තිබෙනවා.

යම් හෙයකින් ඔබේ පරිශ්‍රය තුළ සිට යම් අපරාධයක් සිදුවුවහොත්, එහි වගකීමෙන් නිදහස් වීමට නිවාස හිමියන්ට නොහැකිවන බව පොලිස් මාධ්‍ය ප්‍රකාශකවරයා අවධාරණය කළා.