ශ්‍රී ලංකන් හිටපු CEO කපිල චන්ද්‍රසේනගේ සිරුර කොල්ලුපිටියේ නිවසකින් හමුවෙයි.. මුළු රටම කතාවෙන අබිරහස් මරණය..|Hiru TV Blog

ශ්‍රී ලංකන් හිටපු CEO කපිල චන්ද්‍රසේනගේ සිරුර කොල්ලුපිටියේ නිවසකින් හමුවෙයි.. මුළු රටම කතාවෙන අබිරහස් මරණය..

Friday, 08 May 2026 - 10:43 | Views - 81

ශ්‍රී ලංකන් ගුවන් සමාගමේ හිටපු ප්‍රධාන විධායක නිලධාරී (CEO) කපිල චන්ද්‍රසේනගේ සිරුර කොල්ලුපිටිය ප්‍රදේශයේ පිහිටි නිවසක සැකකටයුතු ලෙස මියගොස් සිටියදී සොයාගෙන තිබෙනවා.

ඔහු මියයන විට ඔහු සම්බන්ධයෙන් අධිකරණය දැඩි නීතිමය තීරණ කිහිපයක් ගෙන තිබූ බව වාර්තා කළා.

එයාර් බස් මිලදී ගැනීමේදී අල්ලස් ලබාගත්තේ යැයි කියන සිද්ධියට අදාළව සැකකරුවෙකු ලෙස නම්කර සිටි කපිල චන්ද්‍රසේන යළි අත්අඩංගුවට ගන්නා ලෙස කොළඹ ප්‍රධාන මහේස්ත්‍රාත් අසංග එස්. බෝදරගම ඊයේ (07) වරෙන්තු නිකුත් කරලා තිබෙනවා.

නුසුදුසු ඇපකරුවන් ඉදිරිපත් කරමින් ඇප කොන්දේසි උල්ලංඝනය කළ බවට එල්ල වූ චෝදනා මත මේ වරෙන්තුව නිකුත් කළබව වාර්තා කළා.

කපිල චන්ද්‍රසේන වෙනුවෙන් කිසිදු හිතවත්කමක් නොමැති පුද්ගලයින් දෙදෙනෙකු රුපියල් 15,000ක මුදලකට ඇපකරුවන් ලෙස පෙනී සිට ඇති බව අනාවරණය වෙලා තිබෙනවා.

"දේවා" හා "තිස්ස" යන අයගේ ඉල්ලීම මත මේ පුද්ගලයින් මුදලට ඇප වී ඇති බවත්, ඔවුන්ට ස්ථිර ආදායම් මාර්ගයක් නොමැති බවත් පොලිසිය අධිකරණයට ප්‍රකාශ කළා.

මේ වංචනික ක්‍රියාව සම්බන්ධයෙන් අදාළ පුද්ගලයින් දෙදෙනා මැයි 13 වනදා දක්වා රක්ෂිත බන්ධනාගාරගත කිරීමට අධිකරණය පියවර තිබෙනවා.

2013 වසරේදී ශ්‍රී ලංකන් ගුවන් සේවය සඳහා ගුවන් යානා 10ක් මිලදී ගැනීමේ ක්‍රියාවලියට අදාළව රක්ෂිත බන්ධනාගාරගතව සිටි කපිල චන්ද්‍රසේන, රුපියල් මිලියන 10 බැගින් වූ ශරීර ඇප තුනක් මත මීට පෙර නිදහස් කරලා තිබෙනවා.

කෙසේවෙතත්, ඇපකරුවන් සම්බන්ධ සැකය මත ඔහුගේ ඇප අවලංගු කර යළි බන්ධනාගාරගත කරන ලෙස අල්ලස් කොමිසම කළ ඉල්ලීමක් මත නඩු විභාගය පැවැත්වෙමින් තිබූ බව වාර්තාවුණා.

මෙවැනි පසුබිමක ඔහුගේ සිරුර හමුවීම සම්බන්ධයෙන් කොල්ලුපිටිය පොලිසිය විශේෂ විමර්ශනයක් ආරම්භ කරලා තිබෙනවා.