රයිස් හා බුරියානි මිලට එකපාරටම මොකද වුණේ..අද ඉඳන් සාක්කුවට දැනෙන වෙනසක්..|Hiru TV Blog

රයිස් හා බුරියානි මිලට එකපාරටම මොකද වුණේ..අද ඉඳන් සාක්කුවට දැනෙන වෙනසක්..

Thursday, 07 May 2026 - 14:54 | Views - 103

මෙරට ආපනශාලා කර්මාන්තයට දැඩි බලපෑමක් එල්ල කරමින්, අද (07) මධ්‍යම රාත්‍රියේ සිට ක්‍රියාත්මක වන පරිදි රයිස්, බුරියානි හා නාසිගුරාන් මිල රුපියල් 25.00කින් ඉහළ දැමීමට තීරණය කරලා තිබෙනවා.

සමස්ත ලංකා ආපනශාලා හා අවන්හල් හිමියන්ගේ සංගමයේ සභාපති හර්ෂණ රුක්ෂාන් මේ බව නිල වශයෙන් ප්‍රකාශ කළා.

ඊයේ (06) මධ්‍යම රාත්‍රියේ සිට ලාෆ් ගෑස් (Laugfs Gas) සිලින්ඩරයක මිල ඉහළ යාම මේ තීරණයට ප්‍රධාන හේතුව වෙලා තිබෙනවා.

මෙරට ඉතිහාසයේ ප්‍රථම වතාවට ගෑස් සිලින්ඩරයක මිල රුපියල් 6,000 සීමාව ඉක්මවා ගොස් ඇති බවට සභාපතිවරයා මෙහිදී චෝදනා කළා.

සිය ජාලය තුළ සිටින ආපනශාලා හිමියන්ගෙන් සියයට 25ත් 30ත් අතර පිරිසක් ලාෆ් ගෑස් භාවිත කරන බවද ඔහු අනාවරණය කළා.

ප්‍රධාන ආහාර වේල්වලට අමතරව තේ කෝප්පයක මිල රුපියල් 5.00කින් හා කිරි තේ කෝප්පයක මිල රුපියල් 10.00කින් ඉහළ දැමීමට පියවරගෙන තිබෙනවා.

එසේම පවතින තත්ත්වය හමුවේ කෙටි ආහාර (Short Eats) මිල ද රුපියල් 5.00කින් ඉහළ දැමීමට කටයුතු කරන බව සභාපතිවරයා වැඩිදුරටත් සඳහන් කළා.

පවතින අධික මිල ඉහළ යාම හේතුවෙන් මෙරට ආපනශාලා කර්මාන්තයට දැඩි හානියක් සිදුව ඇතිබව වාර්තා කරලා තිබෙනවා.

මේ තත්ත්වය හමුවේ සාමාන්‍ය ගෘහණිය පවා දැඩි අගතියට පත්වූ බවත්, පාරිභෝගිකයාට මේ බර දරාගත නොහැකි මට්ටමකට පැමිණ ඇති බවත් සභාපතිවරයා අවධාරණය කළා.