අද දහවල් අධ්‍යාපන අමාත්‍යාංශය ඉදිරිපිට උණුසුම් තත්ත්වයක්.. විශ්වවිද්‍යාල සිසුන් එළියට බසී..|Hiru TV Blog

අද දහවල් අධ්‍යාපන අමාත්‍යාංශය ඉදිරිපිට උණුසුම් තත්ත්වයක්.. විශ්වවිද්‍යාල සිසුන් එළියට බසී..

Monday, 27 April 2026 - 15:18 | Views - 89

අධ්‍යාපන අමාත්‍යාංශය ඉදිරිපිට අද (27) දහවල් දැවැන්ත විරෝධතාවක් පැවැත්වීමත් සමඟ එම ප්‍රදේශයේ දැඩි නොසන්සුන්කාරී තත්ත්වයක් හටගෙන තිබෙනවා.

මෙලෙස විරෝධතාවයේ නිරතවී ඇත්තේ ගම්පහ වික්‍රමාරච්චි දේශීය වෛද්‍ය විශ්වවිද්‍යාලයේ දේශීය සෞඛ්‍ය විද්‍යා හා තාක්ෂණ පීඨයේ ශිෂ්‍ය සංගමයයි.

සිය අධ්‍යයන හා සුභසාධන ගැටලුවලට බලධාරීන් මෙතෙක් විසඳුම් ලබානොදීම හේතුවෙන් මොවුන් මෙලෙස අමාත්‍යාංශය වැටලීමට පියවරගෙන තිබෙනවා.

සිසුන් පවසන්නේ විශ්වවිද්‍යාලයේ පවතින අර්බුදකාරී තත්ත්වය පිළිබඳ සොයාබැලීමට පත්කළ විශේෂඥ කමිටුවේ නිර්දේශ වාර්තාව, 2025 ජූලි මස 02 වැනිදා අග්‍රාමාත්‍යවරිය වෙත ඉදිරිපත්කර ඇති බවයි.

එහෙත් එම වාර්තාව ඉදිරිපත්කර මාස කිහිපයක් ගතවී ඇතත්, එහි සඳහන් නිර්දේශ ක්‍රියාත්මක කිරීමට බලධාරීන් මෙතෙක් කිසිදු පියවරක්ගෙන නොමැති බවට සිසුන් බරපතළ ලෙස චෝදනාකරනවා.

කමිටු නිර්දේශ ක්‍රියාත්මක නොවීම නිසා විශ්වවිද්‍යාලයේ දෛනික අධ්‍යයන කටයුතු මෙන්ම ශිෂ්‍ය සුභසාධනයද මේ වනවිට බරපතළ ලෙස කඩාවැටී ඇතිබව ශිෂ්‍ය සංගමය පෙන්වාදෙනවා.

තම ගැටලුවලට සාධාරණ විසඳුමක් ලැබෙනතෙක් සටන අත්නොහරින බව පවසන සිසුන්, අදාළ නිලධාරීන් වහාම මේ සම්බන්ධයෙන් මැදිහත් වියයුතු බව අවධාරණයකර සිටිනවා.