සතියකට පෙර දුන් අනතුරු ඇඟවීම සැබෑවෙමින් ජපානය යළිත් සලිතවෙයි. තත්ත්වය බරපතලද?|Hiru TV Blog

සතියකට පෙර දුන් අනතුරු ඇඟවීම සැබෑවෙමින් ජපානය යළිත් සලිතවෙයි. තත්ත්වය බරපතලද?

Monday, 27 April 2026 - 8:04 | Views - 104

උතුරු ජපානයේ හොකයිඩෝ (Hokkaido) දූපත් කලාපයේ අද (27) අලුයම ප්‍රබල භූමිකම්පාවක් සිදුවෙලා තිබෙනවා. රික්ටර් මාපකයේ ඒකක 6.2 ක ප්‍රබලත්වයකින් මේ භූ කම්පනය වාර්තාවී ඇතිබව විදෙස් මාධ්‍ය පැවසුවා.

මේ භූමිකම්පාවත් සමඟ ප්‍රදේශයේ ජනතාව දැඩි භීතියට පත්වුණත් කම්පනය හේතුවෙන් කිසිදු ජීවිත හානියක් හෝ දේපල හානියක් සිදුවූ බවට මෙතෙක් තොරතුරු වාර්තාවෙලා නැහැ.

ජපාන කාලගුණ විද්‍යා ඒජන්සිය සඳහන් කළේ, මේ භූ කම්පනයත් සමඟ සුනාමි අනතුරු ඇඟවීමක් නිකුත්කිරීමට අවශ්‍යතාවයක් පැනනොනැගුණු බවයි.

එක්සත් ජනපද භූ විද්‍යා සමීක්ෂණ ආයතනයට (USGS) අනුව, භූමිකම්පාවේ කේන්ද්‍රය සරබෙට්සු (Sarabetsu) නගරයට කිලෝමීටර් 18 ක් බටහිරින් පිහිටලා තිබෙනවා. එය පොළොව මතුපිට සිට කිලෝමීටර් 81ක් ගැඹුරින් සිදුවෙලා තිබෙනවා.

මීට සතියකට පෙර ජපානයේ සිදුවූ ඒකක 7.7ක ප්‍රබල භූමිකම්පාවත් සමඟ, එරට ඊසානදිග වෙරළ තීරයට ඉදිරියේදී දැවැන්ත භූ කම්පනයක් ඇතිවීමේ අවදානමක් පවතින බවට බලධාරීන් මීටපෙර අනතුරු අඟවලා තිබුණා.

එබැවින් ඉදිරි දින කිහිපය තුළදී අවදියෙන් පසුවනලෙස ජපාන සහන සේවාඅංශ එරට ජනතාවගෙන් ඉල්ලා සිටිනවා.

සටහන: හිරු ප්‍රවෘත්ති ඇසුරෙන්.