ඔබේ බැංකු ගිණුමත් අවදානමේද? හදිසියේවත් මේ වගේ ව්‍යාජ වෙබ් අඩවිවලට රැවටෙන්න එපා!|Hiru TV Blog

ඔබේ බැංකු ගිණුමත් අවදානමේද? හදිසියේවත් මේ වගේ ව්‍යාජ වෙබ් අඩවිවලට රැවටෙන්න එපා!

Tuesday, 21 April 2026 - 13:12 | Views - 67

පෞද්ගලික බැංකුවක නිල වෙබ් අඩවියට සමාන අයුරින් ව්‍යාජ වෙබ් අඩවියක් (Fake Website) නිර්මාණය කර රුපියල් ලක්ෂ දහයකට අධික මුදලක් වංචා කළ සැකකරුවෙකු පරිගණක අපරාධ විමර්ශන අංශය මගින් අත්අඩංගුවට ගෙන තිබෙනවා.

වයඹ පළාත් ඒකකය මගින් සිදුකළ විශේෂ විමර්ශනයකදී මේ සැකකරු හසුවූ බව පොලිස් මූලස්ථානය සඳහන් කළා.

ව්‍යාජ ලෙස සකස්කළ වෙබ් අඩවියක් ඔස්සේ පෞද්ගලික බැංකුවක ගිණුමකින් රුපියල් 1,000,024ක මුදලක් වංචා කිරීම සම්බන්ධයෙන් පරිගණක අපරාධ විමර්ශන අංශයට පසුගිය පෙබරවාරි 16 වනදා පැමිණිල්ලක් ලැබී තිබෙනවා.

ඒ අනුව ක්‍රියාත්මකවූ නිලධාරීන් දීර්ඝ කාලයක් තිස්සේ සිදුකළ තාක්ෂණික විමර්ශනයකින් අනතුරුව ඊයේ (20) දහවල් මේ සැකකරු අත්අඩංගුවට ගැනීමට සමත්වෙලා තිබෙනවා.

මෙලෙස අත්අඩංගුවට ගෙන ඇත්තේ මිනුවන්ගොඩ ප්‍රදේශයේ පදිංචි 22 හැවිරිදි තරුණයෙක්.

අත්අඩංගුවට ගැනීමෙන් පසුව සැකකරු වාරියපොළ පොලිස් ස්ථානය වෙත ඉදිරිපත් කිරීමට නිලධාරීන් පියවරගෙන තිබෙනවා.

අත්අඩංගුවට ගත් 22 හැවිරිදි සැකකරු අද (21) දින කුරුණෑගල මහේස්ත්‍රාත් අධිකරණය වෙත ඉදිරිපත් කිරීමට නියමිතව තිබෙනවා.

පරිගණක අපරාධ විමර්ශන අංශයේ වයඹ පළාත් ඒකකය මගින් සිද්ධිය සම්බන්ධයෙන් වැඩිදුර විමර්ශන කටයුතු මෙහෙයවනු ලබන බවයි වාර්තා වෙන්නේ.

මෙවැනි ව්‍යාජ වෙබ් අඩවිවලට රැවටී තමන්ගේ බැංකු තොරතුරු ලබා නොදෙන ලෙසත්, නිරන්තරයෙන් අවධානයෙන් පසුවන ලෙසත් ආරක්ෂක අංශ ජනතාවගෙන් ඉල්ලා සිටිනවා.