අවුරුදු නිවාඩුවට නාන්න යන අයගේ අවධානයට! කිතුල්ගලදී තවත් වටිනා ජීවිතයක් දිය රකුසාට බිලිවෙයි.|Hiru TV Blog

අවුරුදු නිවාඩුවට නාන්න යන අයගේ අවධානයට! කිතුල්ගලදී තවත් වටිනා ජීවිතයක් දිය රකුසාට බිලිවෙයි.

Thursday, 16 April 2026 - 13:49 | Views - 205

අලුත් අවුරුදු සතුට සමරන්න නෑදෑ හිතමිතුරෝ එක්ක විනෝද වෙන්න යන එක අපේ සිරිතක් වුණත්, ඒ යන ගමන් මඟදී අපි කොයිතරම් පරෙස්සම් වෙන්න ඕනෙද කියන එක පසක් කරමින් ඊයේ (15) දහවල් කනගාටුදායක පුවතක් වාර්තාවුණා.

කිතුල්ගල, නැලිගම ප්‍රදේශයේදී කැලණි ගඟේ දිය නාන්න ගිය පුද්ගලයෙක් දියේ ගිලීමෙන් ජීවිතක්ෂයට පත්වෙලා තිබෙනවා.

හැටන්, මොරහේනගම ප්‍රදේශයේ පදිංචි 46 හැවිරිදි පුද්ගලයෙක් තමයි මෙලෙස අවාසනාවන්ත ලෙස මියගොස් තියෙන්නේ. මොහු තමන්ගේ නෑදෑ හිතමිතුරන් පිරිසක් එක්ක විනෝද වෙන්න නැලිගම ප්‍රදේශයට ඇවිත් දිය නාමින් ඉන්න අතරතුරයි මේ අනතුරට මුහුණ දීලා තියෙන්නේ.

මොහු දියේ ගිලී අතුරුදහන් වූ බවට ලැබුණු පණිවිඩයත් එක්ක කිතුල්ගල පොලිසිය වහාම ක්‍රියාත්මක වුණා. පසුව පොලිස් විශේෂ කාර්ය බලකායේ (STF) ජීවිත ආරක්ෂක නිලධාරීන් කණ්ඩායමක් කැඳවලා විශේෂ සෝදිසි මෙහෙයුමක් ආරම්භ කළා.

පැය කිහිපයක මෙහෙයුමකින් පස්සේ, ගඟේ තිබුණු ගැඹුරු වළක රැඳී තිබුණු ඔහුගේ මෘත ශරීරය සොයාගැනීමට නිලධාරීන්ට හැකිවෙලා තිබෙනවා.

අවුරුදු සමයේ ගංගා, ඇළ දොළවල දිය නෑමට යනකොට ඒ ස්ථානවල පවතින අවදානම ගැන ගොඩක් සැලකිලිමත් වෙන්න ඕනේ. විශේෂයෙන්ම තමන් නොදන්නා හෝ ගැඹුරු වළවල් සහිත ස්ථානවල දිය නෑමෙන් වැළකී සිටීම ජීවිත ආරක්ෂා කරගන්න තියෙන හොඳම ක්‍රමයයි. මේ සිද්ධිය සම්බන්ධයෙන් කිතුල්ගල පොලිසිය වැඩිදුර විමර්ශන පවත්වනවා.

සටහන: හිරු ප්‍රවෘත්ති ඇසුරෙනි.

Share This Article