වයස 72 දී සිහිනය ජයගත් සැබෑ වීරයෙක්.. දරුවන්ගේ උපාධි සිහිනය වෙනුවෙන් කැපවුණු "ටාටයි" ගේ කඳුළු කතාව මෙන්න..|Hiru TV Blog

වයස 72 දී සිහිනය ජයගත් සැබෑ වීරයෙක්.. දරුවන්ගේ උපාධි සිහිනය වෙනුවෙන් කැපවුණු "ටාටයි" ගේ කඳුළු කතාව මෙන්න..

Wednesday, 08 April 2026 - 13:20 | Views - 228

ඔහු උත්සාහවන්ත පියෙක්..

ඒ විතරක් නෙවෙයි, කවදා හෝ තමන්ගේ සිනිහය සැබැවක් කරගත් ඔහු ඇත්තෙන්ම ධෛර්යවන්ත පුද්ගලයෙක්.

මේ වයස 72 දී සිහිනය ජයගත් සැබෑ වීරයෙක් පිලිපීනයේ 'ටාටයි එබැන්ග්' ගේ අභිප්‍රේරණාත්මක කතාවක්..

වයස යනු හුදෙක් ඉලක්කමක් පමණක් බවත්, නොපසුබට උත්සාහය තිබෙනවා නම් ඕනෑම සිහිනයක් සැබෑ කරගත හැකි බවත් ලොවටම පසක් කළ අපූරු පුවතක් පිලිපීනයෙන් වාර්තා වෙනවා. ඔහු නමින් ඩියෝස්ඩාඩෝ "ටාටයි එබැන්ග්" එවන්ජලිස්ටා (Diosdado "Tatai Ebang" Evangelista) නම් වූ ආදරණීය පියෙක්.

තම ජීවිතයේ වැඩි කාලයක් කුඹුරු සහ උක් වගාබිම්වල වෙහෙස මහන්සි වී වැඩ කළ ටාටයි, වචනයේ පරිසමාප්ත අර්ථයෙන්ම කැපකිරීම් කළ පියෙක්.

ඔහුගේ එකම අරමුණ වූයේ තම දරුවන් සිව්දෙනාට හොඳින් ඉගැන්වීමයි. දරුවන් සිව්දෙනාම උපාධිධාරීන් බවට පත් කරන තෙක් ඔහු තම පෞද්ගලික සිහින පසෙක තබා වෙහෙස නොබලා වැඩ කළා.

තම දරුවන්ගේ අධ්‍යාපන කටයුතු අවසන් වූ පසු, වයස අවුරුදු 69 දී ඔහු තීරණය කළේ තමා වසර ගණනාවක් තිස්සේ කල් දැමූ සිහිනය සැබෑ කර ගැනීමටයි.

ඒ අනුව ඔහු කෘෂිකාර්මික උපාධිය සම්පූර්ණ කළ අතර, ඉන් නොනැවතී වයස අවුරුදු 72 දී බලපත්‍රලාභී කෘෂිකර්ම නිලධාරියෙකු (Licensed Agricultural Officer) වීමේ විභාගයට පෙනී සිටියා.

ගොවිතැන සම්බන්ධයෙන් දශක ගණනාවක ප්‍රායෝගික අත්දැකීම් තිබුණද, වර්තමාන ඩිජිටල් ලෝකය ඔහුට අභියෝගයක් වුණා. විශේෂයෙන්ම මාර්ගගත ලියාපදිංචිය (Online Registration) සහ නවීන තාක්ෂණය හැදෑරීමේදී ඔහුට විශාල උත්සාහයක් දැරීමට සිදුවුණා.

පළමු වරට විභාගයෙන් අසමත් වුවද ඔහු පසුබට වූයේ නැහැ. තම පන්තියේ තරුණ සිසුන්ගේ මෙන්ම නාඳුනන පිරිසකගේද සහාය ඇතිව ඔහු නව තාක්ෂණය උගත් අතර, අවසානයේ 2025 වසරේදී විභාගය සමත්ව බලපත්‍රලාභී නිලධාරියෙකු වීමට වරම් ලැබුණා.