අවුරුදු සෙනඟට කලින් පිටකොටුව ලෑස්තියි! හෙට සිට වැඩ අල්ලන මධ්‍යම බස් නැවතුම්පොළ..|Hiru TV Blog

අවුරුදු සෙනඟට කලින් පිටකොටුව ලෑස්තියි! හෙට සිට වැඩ අල්ලන මධ්‍යම බස් නැවතුම්පොළ..

Tuesday, 07 April 2026 - 14:46 | Views - 179

පිටකොටුව මධ්‍යම බස් නැවතුම්පොළට ගිය කාටත් දැන් එහි වෙනස පැහැදිලිවම පේන්න තියෙනවා. රුපියල් මිලියන 424ක වියදමින් සිදුකෙරෙන දැවැන්ත නවීකරණ ව්‍යාපෘතියේ පළමු අදියර මේ වනවිට සාර්ථකව අවසන් කර තිබෙන අතර, හෙට (08) සිට එහි මෙහෙයුම් කටයුතු නිල වශයෙන් ආරම්භ කරන බව ප්‍රවාහන නියෝජ්‍ය අමාත්‍ය ප්‍රසන්න ගුණසේන ප්‍රකාශකළා.

'Clean Sri Lanka' වැඩසටහන යටතේ ක්‍රියාත්මක වූ මේ ව්‍යාපෘතියට ශ්‍රී ලංකා ගුවන් හමුදාවේ ශ්‍රම දායකත්වය උපරිමයෙන්ම ලැබුණා. පවතින ගොඩනැගිලි අලුත්වැඩියාව පමණක් නොව, නවීන තොරතුරු මධ්‍යස්ථානයක් හා උසස් මට්ටමේ සනීපාරක්ෂක පහසුකම්ද දැන් මගීන්ට විවෘතයි.

බස්රථ පෝලිම් සඳහාම වෙන්වූ බාහිර ප්‍රදේශයක් අලුතින් සකස්කර ඇති නිසා මින් ඉදිරියට මගීන්ට තෙරපීමකින් තොරව බස්රථය වෙත යාමට හැකියාව ලැබෙනවා.

මේ නවීකරණය නිසා පිටකොටුව බස් නැවතුම්පොළට ජාත්‍යන්තර මට්ටමේ පෙනුමක් දැන් ලැබිලා තිබෙනවා.

සමස්ත ප්‍රතිසංස්කරණ සඳහා මිලියන 424ක් වැය වන මෙම ව්‍යාපෘතිය අවසන් වූ පසු මහල් තුනකින් සමන්විතව මගීන්ටත්, සේවක මණ්ඩලයටත් සියලු පහසුකම් එකම වහලක් යටදී ලබා ගැනීමට හැකිවෙනවා.

අවුරුදු නිවාඩුවට ගම්බිම් බලා යන ජනතාවට හෙට සිට අලුත් අත්දැකීමක් විඳගන්න අවස්ථාව ලැබෙනවා.