එදා සල්ලි නැති නිසා ආදරය පැරදුණු කොල්ලා, අද ලංකාවම හෙල්ලූ 'Smart' මන්දිරයක හිමිකරුවෙක් වුණු හැටි. උපුල් වීරසිංහගේ සංවේදී කතාව|Hiru TV Blog

එදා සල්ලි නැති නිසා ආදරය පැරදුණු කොල්ලා, අද ලංකාවම හෙල්ලූ 'Smart' මන්දිරයක හිමිකරුවෙක් වුණු හැටි. උපුල් වීරසිංහගේ සංවේදී කතාව

Monday, 09 March 2026 - 16:30 | Views - 255

ලංකාවේ උපකාරක පන්ති ක්ෂේත්‍රය තුළ උපුල් වීරසිංහ යනු නම ඇසුණු පමණින් කවුරුත් හඳුනන දැවැන්ත චරිතයකි.

ඔහු දිනාගත් ජනප්‍රියත්වය සහ ආර්ථික ශක්තිය පිටුපස ඇත්තේ කඳුළු, දහඩිය සහ දැඩි කැපවීම මුසු වූ අතීතයකි. පසුගියදා ඔහු පදිංචියට ගිය අතිනවීන 'ස්මාර්ට් මන්දිරය' පිළිබඳව සමාජ මාධ්‍ය උඩුයටිකුරු කරමින් කතාබහට ලක්වන්නේ, එම සාර්ථකත්වය හරහා ඔහු ලබා දෙන ප්‍රබල පණිවිඩය නිසාවෙනි.

බොහෝ දෙනා දකින්නේ අද සිටින සාර්ථක වෘත්තිකයා වුවත්, පාසල් වියේදී උපුල් වීරසිංහ යනු හුදෙක් සිහින පමණක් ඉතිරි වූ තරුණයෙකි. එකල ඔහුට ඉතාම අවංක ප්‍රේම සම්බන්ධතාවයක් තිබුණද, එම ආදරය හමුවේ "දුප්පත්කම" මහා පවුරක් විය. අතේ සතේ නැති වීම හේතුවෙන් පෙම්වතියගේ පාර්ශවයෙන් එල්ල වූ දැඩි විරෝධය හමුවේ, අවසානයේ ඔහුට තමන්ගේ ආදරය අත්හැර දැමීමට සිදු විය. "සල්ලි නැතිනම් ආදරය කරන්න බැහැ" යන සමාජ මතය එදා ඔහුව දැඩිව පීඩාවට පත් කළේය.

නමුත් ඒ පරාජය ඔහු සිය ජයග්‍රහණයේ පදනම කරගත්තේය. පසුගියදා උපුල් වීරසිංහ මහතා සිය නව නිවසේ පදිංචියට ගිය අතර, එය ලංකාවේ මෙතෙක් ඉදි වූ නවීනතම තාක්ෂණයෙන් යුත් නිවෙස් අතර ඉදිරියෙන්ම පවතී.

මෙහි ප්‍රධාන දොරටුව විවෘත වන්නේ මුහුණ හඳුනාගැනීමේ (Face Unlock) තාක්ෂණයෙනි. නිවසට ඇතුළු වූ සැණින් වායුසමීකරණ යන්ත්‍ර (AC) ක්‍රියාත්මක වන අතර, ජනෙල් රෙදි (Curtains) ඉබේම විවෘත වේ. ඔබ නිවසේ ගමන් කරන විට, ඔබ සිටින ස්ථානය හඳුනාගෙන විදුලි බුබුළු දැල්වීම සහ නිවීම ස්වයංක්‍රීයව සිදු වේ. නිවසේ ගෙවත්තේ ඇති ශාකවලට අවශ්‍ය වේලාවට ජලය සැපයෙන්නේ කිසිවෙකුගේ මැදිහත් වීමකින් තොරවය.

මෙම මන්දිරයේ ඇති සුවිශේෂීම අංගය වන්නේ එහි පළමු මහලයි. එහි ඇත්තේ එකම එක නිදන කාමරයක් පමණි. උපුල් වීරසිංහ මහතා සිය පළමු මහල සම්පූර්ණයෙන්ම වෙන් කර ඇත්තේ ඔහුගේ ආදරණීය මෑණියන්ට සහ පියාණන්ටය. ඔවුන්ගේ පහසුව සහ වයෝවෘද්ධ භාවයට උපරිම ගෞරවය ලැබෙන පරිදි, සියලු තාක්ෂණික පහසුකම් සහිතව එම මහල නිර්මාණය කර තිබීම ඔහු තුළ ඇති මානුෂීය ගුණය මැනවින් විදහා පායි. දෙවන මහල ඔහු සහ ඔහුගේ පවුලේ අය වෙනුවෙන් වෙන් කර ඇත.

එදා සල්ලි නැති නිසා ආදරය ප්‍රතික්ෂේප කළ අයට සහ සමාජයට, උපුල් වීරසිංහ ලබා දී ඇති පිළිතුර ඉතා පැහැදිලිය. එනම්, අසීමිත ධෛර්යය සහ උත්සාහය තිබේ නම්, ඕනෑම අගහිඟකමක් පරදා ලෝකයම මවිත කරවන සාර්ථකත්වයක් අත්කර ගත හැකි බවයි.