මේ කියන්න යන කාරණය ගැන ඔබත් මේ වෙනකොට දැනගන්න සූදානමින් ඇති. මේ අන්න ඒ ගැන කතාවක්. සූර්යය මස වෘශ්චික, රවි 4 භාගයක් වූ චන්ද්‍ර මස උඳුවප් පුර විසේනිය ලත් කුජ දින 2025.11.25 පෙ.ව. 7.02ට බුධ සහ සිකුරු අතර ග්‍රහ යුද්ධයෙන් බුධ ජය කෙහෙළි නංවුණා. මෙම ග්‍රහ යුද්ධය ගුරුට අයත් වීසා නැකතේ තෙවැනි පාදය තුළ සිදු වේ. වීසා නැකත වනාහි කෲර, රක්ත වර්ණ, පුල්ලිංග, ත්‍රිපද, අධෝමුඛ, තේජෝභූත තාරකා 4 කින් යුත් නැකතකි. කුම්භ ලග්න ලංකා කේන්ද්‍රයේ මෙම ග්‍රහ යුද්ධය නවවෙනි භාවය තුළ සිදු වනු ඇත. ඒ අනුව අධිකරණය, ආගමික නායකයන් වහන්සේලා, ආගමික ස්ථාන, දේශීය වෙළෙඳපොළ යන ස්ථාන, පුද්ගලයන්ට තවදුරටත් ගැටලු ඇති වන බව පෙනේ. මේ මොහොත වනවිට ගණ්ඩාන්ත දෝෂය ද පවතින අතර භව කරණය ද, රවි හෝරාව ද මෙහිදී පවතින අතර තත්කාල ලග්නය වශයෙන් වෘශ්චික ලග්නයත්, කුම්භ නවාංශකයත් උදාව පවතිනවා. එහිදී ලග්නගතව රවි, කුජ ද තෙවැන්නේ සඳු ද, සිව්වැන්නේ රාහු ද, පස්වැන්නේ ශනි ද, නවවැන්නේ වක්‍ර ගුරු ද, දොළොස් වැන්නේ බුධ, සිකුරු ද මෙසේ ගමන්ගෙන තිබුණා. තත්කාල කේන්ද්‍රයේ 22 වන දෙර්කානාධිපති සිකුරුට අයත්ව ගමන් කිරීම සහ ග්‍රහ යුද්ධයෙන් සිකුරු පරාජය වීම හේතු කොට ගෙන කාන්තාවන්ට සහ රැඳවියන්ට තවදුරටත් කරදර ඇති වන පුවත් අසන්නට ලැබෙනවා. විකෘති කාම අපරාධවල වර්ධනයක් ද පෙන්නුම් කරයි. මෙරට සිටි ප්‍රවීණ කලාකාරියකගේ හදිසි වියෝවක් ද ඉදිරි දින කිහිපය තුළ පෙන්නුම් කරනු ලබයි. එමෙන්ම සිකුරු සාගරයට ද කාරක බැවින් ප්‍රබල සාගර භූ කම්පන තත්ත්වයන්ද ඉදිරියේදී පෙන්නුම් කරනු ලබයි. මෙහිදී බුධගේ ජය ලැබීම හේතු කොටගෙන බුද්ධිය මෙහෙයවා කටයුතු කරන අයට මාධ්‍යවේදීන්ට, මාධ්‍ය ආයතනවලට මෙන්ම විපක්ෂ කණ්ඩායම්වලට යහපත් බවක් ඇති කරයි. රට පුරා ආගමික ප්‍රබෝධයක්ද දැක ගතහැකි වෙනවා. දෙසැම්බර් 06 මිථුන රාශිය තුළ වක්‍ර චලිතයේ ගුරු ගමන් කිරීම හේතු කොටගෙන 2026 මාර්තු 14 තෙක් (එම කාලය තුළ) බදු බර වැඩිවීම් ද පෙන්නුම් කරයි. රාජ්‍ය ආයතනවල දූෂණ, අක්‍රමිකතා හෙළි වන කාලයක් ද වෙනවා. ගණ්ඩාන්ත දෝෂය ද විෂ සහිත බැවින් ජනතාවට නොයෙක් කරදරවලට පවා මුහුණ දීමට සිදු වන මාස කිහිපයකි. මහජන මුදල් හානි වන පුවත් ද අසන්නට ලැබේ. එමෙන්ම රෝහල් සහ බන්ධනාගාර ආශ්‍රිතව යම් යම් ගැටලු, බාධක පුවත් ද අසන්නට ලැබෙනවා. තැපැල්, විදුලි, දුම්රිය යන ආයතනවල ගැටලු ඇති වීමට ඉඩ පවතින අතර සමහර අවස්ථාවල උස්ඝෝෂණ ඇතිවීමට පවා ඉඩ පවතී. විශ්ව කේන්ද්‍රයේ රහස් කුමන්ත්‍රණ රාශියක් තත්කාල ලග්නය වීම තුළ යම් යම් අයගේ රහස් එළි වන කාලයක් ද වේ. ඔබ සුභ මුහුර්තියක් සෑදීමේදී ග්‍රහ යුද්ධයක් පවතින දිනක යොදා නොගැනීම නොකළ යුතුය. දෙසැම්බර් 7 තෙක් කුජ වෘශ්චිකයේ සිටින බැවින් හද කම්පා කරවන රිය අනතුරු ගැන අසන්නට ලැබේ. ප්‍රබල රටක ප්‍රබල සිදුවීමක් ගැන ඉදිරි දින කිහිපය තුළ පුවතක් අසන්නට ලැබෙනවා. ඔබ ධාර්මිකව, සිල්වත්ව සිටීම මත මෙම කියන අසුභ තත්ත්වවලින් ඔබට මිදියහැකි වෙනවා. දිවයින පුවත්පත ඇසුරෙන්..