මේ මොහොතේ බොහෝ දෙනෙක් මේ ගැන සැලකිලිමත් වෙන එක වැදගත් වෙනවා. දක්ෂිණ අධිවේගීමාර්ගය භාවිත කරන ඔබට මේ ආරංචිය වැදගත් වේවි.. දක්ෂිණ අධිවේගී මාර්ගයේ කිලෝමීටර් 12 දශම 5 (බද්දේගොඩ ප්‍රදේශයේ) ගැලණිගම සහ කහතුඩුව අතර පැති බැම්ම ඉරිතලා නාය යාමේ අවදානමක් පවතින බැවින් මාර්ගයේ මංතීරුවක් තාවකාලිකව වසා දමා ඇතැයි මාර්ග සංවර්ධන අධිකාරිය පවසනවා. පවතින වැසි සහ ආපදා තත්ත්වය හේතුවෙන් කොළඹ දෙසට දිවෙන මං තීරුවේ පැතිබැම්මෙ මෙම ඉරි තැලීම සිදුව තිබෙනවා. ඒ හේතුවෙන් එම ප්‍රදේශයේ වම් මං තීරුවේ මීටර් 300 ක ප්‍රමාණයක් මෙලෙස ආරක්ෂිත විධිවිධාන ක්‍රම උපයෝගී කර ගනිමින් තාවකාලිකව වසා දැමීමටයි මාර්ග සංවර්ධන අධිකාරිය පියවර ගෙන ඇත්තේ. මේ වනවිට පැති බැම්මේ ඉරි තැලීම සිදුවූ කොටස ඉටි කොළවලින් ආවරණය කර තිබෙන බව සඳහන්. මාර්ග සංවර්ධන අධිකාරියේ ඉංජිනේරුවරුන් සහ තාක්ෂණ නිලධාරීන් ඒ අවට සහ අධිවේගී මාර්ගයේ සියලුම පැති බැමි අධීක්ෂණය කිරීමට බලධාරීන් පියවර ගෙන ඇති බවයි වාර්තා වන්නේ.