ඔබත් සමහරවිට මේ සන්නාමවල භාණ්ඩ මිලදී ගන්න කැමැත්තක් දක්වනවා ඇති. ඒත් ඔබ ව්‍යාජ භාණ්ඩවලට රැවටුණොත්..? ඒ හැඟීම ඔබට කොහොම නම් දැනෙනවා ඇතිද? මේ කියන්න යන්නේ අන්න ඒ වගේ තවත් එක කතාවක්. ගෝලීය ක්‍රීඩා ඇඳුම් සන්නාමයක් වන PUMA, සමාගමේ ලියාපදිංචි වෙළඳ ලකුණු සහිත ව්‍යාජ භාණ්ඩ විකිණීමට සම්බන්ධ බවට චෝදනා එල්ල වන ආයතන හතරකට එරෙහිව කොළඹ වාණිජ මහාධිකරණයෙන් වාරණ නියෝග හතරක් ලබාගෙන ඇති බවට තොරතුරු වාර්තා වෙනවා. 2003 අංක 36 දරන ශ්‍රී ලංකාවේ බුද්ධිමය දේපළ පනත යටතේ ආයතන හතරකට එරෙහිවයි මෙම නඩුව ගොනුකර ඇත්තේ. සමාගමට අනුව, විත්තිකරුවන් නීති විරෝධී ලෙස "PUMA" නම, ලාංඡනය සහ වෙළඳ නාමයේ ගෝලීය වශයෙන් පිළිගත් වෙළඳ ලකුණුවලට රැවටිලිකාර ලෙස සමාන වෙනත් සුවිශේෂී අංග සහිත පාවහන් නිෂ්පාදන අලෙවි කරමින් සිටින බවයි එම ආයතනය මෙහිදී පවසා සිටියේ. දේශීය පාවහන් කර්මාන්තයේ ප්‍රසිද්ධ සිල්ලර වෙළෙන්දන් භාණ්ඩ ව්‍යාජ ඒවා බව දැන සිටින බව හෝ දැන සිටිය යුතු බවයි PUMA තර්ක කරන්නේ. එහි වෙළඳ ලකුණු අනවසරයෙන් භාවිතා කිරීම පාරිභෝගිකයින් නොමඟ යැවීම සහ වෙළඳ නාමයේ කීර්ති නාමයෙන් ප්‍රයෝජන ගැනීම අරමුණු කරගත් බවත් බාල ගුණාත්මක බවින් යුත් ව්‍යාජ භාණ්ඩ සංසරණය වීම සමාගමේ හොඳ හිතට සහ මහජන විශ්වාසයට සැලකිය යුතු හානියක් සිදු කරන බවයි PUMA පවසන්නේ. පෙත්සම් සමාලෝචනය කිරීමෙන් පසු, අමාලි රණවීර සහ චමත් මදනායක යන විනිසුරුවන්, PUMA හි වෙළඳ ලකුණුවලට සමාන හෝ ව්‍යාකූල ලෙස සමාන ලකුණු සහිත ඕනෑම භාණ්ඩයක් නිෂ්පාදනය කිරීම, ආනයනය කිරීම, අලෙවි කිරීම, විකිණීම හෝ වෙනත් ආකාරයකින් බෙදා හැරීම තහනම් කරමින් වාරණ නියෝග නිකුත් කරනු ලැබුවා.