අද දවසේ දේශපාලන කරලිය තුළ කතාබහට ලක්වෙන බොහෝ කාරණා අතරින් මේ කාරණය සුවිශේෂී වූවක්.

හිටපු ජනපති මහින්ද රාජපක්ෂ, ලංකාවේ බොහෝ දෙනෙක්ගේ අවධානය දිනාගන්න සමත්වුණු දේශපාලන චරිතයක් වුණු ඔහු අද සිය විජේරාම නිල නිවසින් පිටව ගියා.

හිටපු ජනාධිපතිවරයා විජේරාම නිල නිවස භාර දී ඔහු මැදමුලනේ පිහිටි සිය නිවස බලා පිටත්ව ගිය බවයි හිටපු ජනාධිපතිවරයාගේ මාධ්‍ය ප්‍රකාශක නීතීඥ මනෝජ් ගමගේ කියා සිටියේ. මේ අතර හිටපු ජනපතිවරුන් වන මෛත්‍රීපාල සිරිසේන සහ චන්ද්‍රිකා බණ්ඩාරණායක කුමාරතුංග යන අයද සිය නිල නිවෙස් රජයට ලබාදීමටයි තීරණය කර තිබෙනවා.

ජනාධිපතිවරුන්ගේ හිමිකම් ඉවත් කිරීමේ පනත් කෙටුම්පත සංශෝධන රහිතව ඊයේ පාර්ලිමේන්තුවේදී සම්මත වුණා. අදාළ පනත් කෙටුම්පත දෙවන වර කියවීමේ ඡන්ද විමසීමේදී ඊට පක්ෂව ඡන්ද 151ක් ලැබුණු අතර, විරුද්ධව ලැබුණේ එක් ඡන්දයක් පමණයි.

ඒ අනුව අදාළ කෙටුම්පත බහුතර ඡන්දයකින් සම්මත වූ බව කථානායකවරයා පාර්ලිමේන්තුවට නිවේදනය කළා.

මේ අතර, ඡන්ද විමසීම සිදුවන අවස්ථාවේදී විපක්ෂය නියෝජනය කරමින් සභා ගර්භයේ රැදී සිටි පාර්ලිමේන්තු මන්ත්‍රි චාමර සම්පත් දසනායක ඊට විරුද්ධව ඡන්දය ලබාදුන් අතර, පාර්ලිමේන්තු මන්ත්‍රි රාමනාදන් අර්ච්චුනා ඊට පක්ෂව ඡන්දය ලබාදීම ද විශේෂත්වයක්.

ජනාධිපතිවරුන්ගේ හිමිකම් අවලංගු කිරීම සඳහා වූ පනත් කෙටුම්පත, පසුගියදා අධිකරණ අමාත්‍ය හර්ෂණ නානායක්කාර පාර්ලිමේන්තුවට ඉදිරිපත් කළ අතර එමගින් හිටපු ජනාධිපතිවරයෙකුට හෝ හිටපු ජනාධිපතිවරයෙකුගේ වැන්දඹුවට සපයන ලද යම් නිවසක් හෝ ගෙවන ලද යම් මාසික දීමනාව අත්හිටුවීමට යෝජනා කර තිබුණා.

එසේම හිටපු ජනාධිපතිවරයෙකුට හෝ හිටපු ජනාධිපතිවරයෙකුගේ වැන්දඹුවට ගෙවන ලද මාසික ලේකම් දීමනාව, නිල ප්‍රවාහන සහ වෙනත් සියලු‍ පහසුකම්ද ඉවත් කිරීමට නියමිතයි.