ට්‍රම්ප් පාලනයත් එක්ක විවිධ තීන්දු තීරණ දැන් නිතර දෙවේලේ වෙනස් වෙනවා කියන එක සාමාන්‍ය කාරණයක් නේ..

මේ කියන්න යන්නේ අන්න ඒ ගැන ඇසෙන තවත් වෙනස් විදිහක ආරංචියක්..

අමෙරිකාවේ වෙසෙන විදේශික ශිෂ්‍යයින් සහ මාධ්‍යවේදීන්ට එහි සිටිය හැකි කාලය සීමා කිරීමට ට්‍රම්ප් පරිපාලනය පියවර ගෙන තිබෙනවා..

යෝජිත වෙනස මගින් අමෙරිකාවේ සංක්‍රමණිකයන් සඳහා තවදුරටත් නීතිය දැඩිකෙරෙනු ඇති බවයි විදෙස් වාර්තාවල දැක්වෙන්නේ..


මේ අනුව විදේශිකයන්ට ශිෂ්‍ය වීසා යටතේ වසර 4කට වඩා අමෙරිකාවේ රැඳී සිටීමේ හැකියාවක් නැහැ..

විදේශීය මාධ්‍යවේදීන්ට දින 240ක් පමණක් සිටිය හැකි අතර තවදුරටත් අමෙරිකාවේ රැඳී සිටීමට අවශ්‍ය නම් දින 240ක් අතිරේකව ඉල්ලා සිටීමේ හැකියාව ලැබෙනවා..

කෙසේවෙතත් චීන මාධ්‍යවේදීන්ට ලැබෙන්නේ දින 90ක අතිරේකව ඉල්ලා සිටිය හැකි කාලසීමාවක් පමණයි..

මේ දක්වා අමෙරිකාවේ අධ්‍යාපන කටයුතුවලදී වීසා නිකුත් කරනු ලැබුවේ අදාළ අධ්‍යාපනික වැඩසටහන් කාලයට සමගාමීවයි..

මාධ්‍යවේදීන් සඳහා වීසා නිකුත් කිරීම ඔවුන්ගේ රැකියා අවශ්‍යතාවට අනුව නිකුත් කරනු ලැබුවා..


කෙසේවෙතත් වසර 10කට වඩා වැඩි කාලයක් සංක්‍රමණික නොවන වීසා වලංගු වූයේ නෑ..


ස්වදේශික ආරක්ෂක දෙපාර්ත‍මේන්තුව චෝදනා කරන්නේ නිශ්චිතව කිව නොහැකි තරම් විදේශිකයන් සංඛ්‍යාවක් දින නියමයක් නොමැතිව සිය අධ්‍යාපන කටයුතු වෙනුවෙන් වීසා දීර්ඝ කරගන්නා බවත් ඔවුන් ‘හැමදාම ශිෂ්‍යයන්’ ලෙස අමෙරිකාවේ වාසය කරමින් සිටිනා බවයි..

2023-2024 අධ්‍යයන වර්ෂය සඳහා අමෙරිකාව විදේශීය සිසුන් මිලියන 1.1කට වීසා නිකුත් කර තිබුණා..

වෙනත් කිසිදු රටක් නොලබන තරම් ආදායමක් අමෙරිකාවට විදේශීය සිසුන්ගෙන් ලැබෙනවා..

නවතම පියවර සම්බන්ධයෙන් උසස් අධ්‍යාපන හා සංක්‍රමණික කටයුතු පිළිබඳ සන්ධානයේ සභාපති මිරියාම් ෆෙල්ඩ්බ්ලම් පවසන්නේ ‘මෙය ලොව පුරා සිටින දක්ෂ පුද්ගලයන්ට ඔවුන්ගේ දායකත්වය අමෙරිකාවට තවදුරටත් වටිනාකමක් නොමැති බවට වන පණිවුඩයක්’ බවයි..