හිරු ශ්‍රද්ධාභිවන්දනා හෙට ඓතිහාසික කැලණිය රජමහා විහාරස්ථානයේදි..|Hiru TV Blog

හිරු ශ්‍රද්ධාභිවන්දනා හෙට ඓතිහාසික කැලණිය රජමහා විහාරස්ථානයේදි..

Monday, 09 June 2025 - 8:32 | Views - 366

මෙවර පොසොන් පුර පසළොස්වක පොහොය දිනය වෙනුවෙන් හිරු මාධ්‍ය ජාලය සංවිධාන කරන හිරු ශ්‍රද්ධාභිවන්දනා වැඩසටහන සම්බුදු පා පහසින් පූජනීයත්වයට පත් වූ ඓතිහාසික කැලණිය රජමහා විහාරස්ථානයේදී හෙට දිනය පුරා පැවැත්වෙනවා.

සිරිලකට සම්බුදු දහම උරුම වූ උතුම් පොසොන් පුර පසළොස්වක පොහොය දිනය නිමිත්තෙන් හිරු මාධ්‍ය ජාලයේ සභාපති රේනෝ සිල්වා මහතාගේ ශ්‍රද්ධාපූර්වක සංකල්පයක් මතයි ”‍ශ්‍රද්ධාභිවන්දනා”‍ මහා පුණ්‍යකර්මය ක්‍රියාත්මක වන්නේ.

පුරා දශකයක් මුළුල්ලේ මේ දක්වා කුල දරුවන් 200කට අධික සංඛ්‍යාවක් සසුන්ගත කරමින් එම සාමණේර හිමිවරුන්ගේ ගිහි භාරකාරිත්වය ද දරනා හිරු මෙවරත් එම උත්තුංග මෙහෙවරට උර දෙන්නේ සම්බුදු සසුනේ චිර පැවැත්ම ඒකායන අරමුණ කරගනිමින්.

හිරු මාධ්‍ය ජාලයේ සභාපති රේනෝ සිල්වා මහතාගේ උදාරතර සංකල්පයක් මත 12 වැනිවරටත් “හිරු ශාසනාවතරණය“ මෙවර සුවිශේෂී පියවරක් තබන්නේ එදා දහස් සංඛ්‍යාත මහරහතන් වහන්සේගේ චීවර වර්ණයෙන් බැබළුණු ඓතිහාසික කැලණිය රජමහා විහාරස්ථාන පුණ්‍ය භූමියේදීයී.

හිරු ශාසනාවතරණය මහා පිංකමෙන් මෙවර කුලදරුවන් 15 දෙනෙකු සඟ සසුනට පූජා කෙරෙන අතර උන්වහන්සේ සියලු‍ දෙනාගේ අධ්‍යාපනික කටයුතු සුපෝෂණය කිරීම ද හිරු ශ්‍රද්ධාභිවන්දනාවට සමගාමීව සිදුකෙරෙන මහඟු‍ පුණ්‍යකර්මයක්. එලෙස සඟ සසුනට පූජා කෙරෙන කුලදරුවන් 15 දෙනාගේ අතපැන් වත් කිරීමේ චාරිත්‍රය කැලණිය රජමහා විහාරස්ථාන පරිශ්‍රයේදී අද පස්වරු 3.33ට යෙදෙන සුබ මොහොතින් සිදුකිරීමට නියමිතයි.

මෙවර හිරු ශ්‍රද්ධාභිවන්දනාවට සමගාමීව ඓතිහාසික කැලණිය රාජමහා විහාරස්ථාන පුදබිමට වැඩම කරන දහසක් වූ භික්ෂූන් වහන්සේ විෂයයෙහි මහා සංඝගත දක්ෂිණාව ද හෙට පිරිනැමෙන්නේ ඉතිහාසයේ පෙර නොවූ විරූ අසමසම මහා දාන පාරමිතාව ද සනිටුහන් කරමින්.

එමෙන්ම, හෙට දිනය පුරා හිරු ශ්‍රද්ධාභිවන්දනා උතුම් පුණ්‍යකර්මයට සමගාමීව ඓතිහාසික කැලණිය ‍රජමහා විහාරස්ථානය කේන්ද්‍ර කරගනිමින් ආමිස සහ ප්‍රතිපත්ති පූජා රැසක් ද පැවැත්වෙනවා. ඒ අනුව පුෂ්ප පූජාව, ශබ්ද පූජාව සහ රටට සහ ජාතියට සෙත් පතා මහා අධිෂ්ඨාන පූජාව ද කැලණිය පින්බිමේදී පැවැත්වීමට නියමිතයි.

එමෙන්ම සම්බුදුරජාණන් වහන්සේගේ පාද ස්පර්ශයෙන් පාරිශුද්ධත්වයට පත් ඓතිහාසික කැලණිය රජමහා විහාස්ථානයේ චෛත්‍ය රාජයාණන් ඉතිහාසයේ ප්‍රථම වතාවට ෂඩ්වර්ණ ආලෝකයෙන් බබළවන උතුම් ආලෝක පූජාව ද හෙට පැවැත්වෙනවා.

කැලණිය රජමහා විහාස්ථාන පුදබිම කේන්ද්‍ර කරගනිමින් පැවැත්වෙන හිරු ශ්‍රද්ධාභිවන්දනා පින්කම් මාලාව සියැසින් දැක කුසල් සිත් උපදවාගැනීමට සැදැහැ සිතින් එක්වන ලෙසට පින්බර ඔබ සැමට ආරාධනා කරනවා.