උණ්ඩ කොපු හතලිස් ගණනකින් දෙවිනුවර ම කැළඹු ද්විත්ව ඝාතනයේ සුලමුල එළියට.. (Video)|Hiru TV Blog

උණ්ඩ කොපු හතලිස් ගණනකින් දෙවිනුවර ම කැළඹු ද්විත්ව ඝාතනයේ සුලමුල එළියට.. (Video)

Sunday, 23 March 2025 - 12:24 | Views - 670

Update..

මාතර දෙවුන්දර ශ්‍රී විෂ්ණු දේවාලයේ දකුණු වාහල්කඩ ඉදිරිපස සිංහාසන මාර්ගයේදී සිදු වූ ද්විත්ව ඝාතනය සම්බන්ධයෙන් අත්අඩංගුවට ගත් කාන්තාව ඇතුළු තිදෙනා මාතර මහේස්ත්‍රාත් අධිකරණයට අද (23) ඉදිරිපත් කිරීමට නියමිතයි.

සැකකරුවන්ගෙන් කළ ප්‍රශ්න කිරීම්වලදී අනාවරණ වී ඇත්තේ, අදාළ ඝාතන ලක්ෂ 50ක කොන්ත්‍රාත්තුවක් මත සිදුව ඇති බවයි.

මාතර දෙවුන්දර ශ්‍රී විෂ්ණු දේවාලයේ දකුණු වාහල්කඩ ඉදිරිපස සිංහාසන මාර්ගයේ සිදු වූ වෙඩි තැබීමකින් තරුණයින් දෙදෙනෙකු මිය ගිය අතර, ජීවිතක්ෂයට පත් වූයේ දෙවුන්දර සිංහාසන පාරේ පදිංචිව සිටි 28 හැවිරිදි යොමේෂ් නදීෂාන් හා 29 හැවිරිදි පසිඳු තාරුක නම් දෙදෙනායි.

ඔවුන් මිතුරෙකුගේ නිවසේ පැවැති මත්පැන් සාදයකට සහභාගී වී යතුරුපැදියකින් ආපසු යමින් සිටියදී පිටුපසින් පැමිණි වෑන් රථයක් යතුරු පැදියේ ගැටීමට සලස්වා, වෑන් රථයෙන් බැස ආ පිරිසක් ඔවුන් දෙදෙනාට වෙඩි තබා තිබූ බව පොලිසිය සඳහන් කළා.

මියගිය යොමේෂ් නදීෂාන් නමැත්තාට එරෙහිව මත්ද්‍රව්‍ය නඩුවක් පවතින බවත් පොලිසිය සඳහන් කළා.

පොලිසිය පැවසුවේ, දෙහිගෙදර රංග නැමැත්තෙකුගේ මෙහෙයවීම මත මෙම ඝාතන සිදුව ඇති බවට සැක පළ කරන අතර යොමේෂ් නදීෂාන් නමැත්තාට පසුගිය කාලයේ මරන තර්ජන ද එල්ල වී තිබූ බවයි.

සිද්ධියෙන් මියගිය පසිඳු තාරුක නමැත්තා කිසිදු අපරාධ චෝදනාවක් නොමැති අයෙකු බව ද පොලිසිය ප්‍රකාශ කළා.

සිද්ධිය සම්බන්ධයෙන් සැකපිට කාන්තාවක ඇතුළු පුද්ගලයින් සිව් දෙනෙකු පොලිසිය අත්අඩංගවට ගත් අතර, ඔවුන්ගෙන් කළ ප්‍රශ්න කිරීම්වලදී අනාවරණ වී ඇත්තේ අදාළ ඝාතන ලක්ෂ 50ක කොන්ත්‍රාත්තුවක් මත සිදුව ඇති බවටයි.

සැකකරුවන් අද මාතර මහේස්ත්‍රාත් අධිකරණය වෙත ඉදිරිපත් කිරීමට නියමිතව තිබෙනවා.

--------------------------------------------

දෙවුන්දර ශ්‍රී විෂ්ණු දේවාලය ඉදිරිපිටදී තරුණයන් දෙදෙනකු වෙඩිතබා ඝාතනය කිරීම සම්බන්ධයෙන් මේ වන විට කරුණු රැසක් අනාවරණය වී තිබෙනවා.

සිද්ධිය සම්බන්ධයෙන් පොලිස් කණ්ඩායම් කිහිපයක් යටතේ තවදුරටත් විමර්ශන ආරම්භ කර ඇති බවයි පොලිසිය පවසන්නේ.

ඒ අනුව ඩුබායි හි සැඟව සිටින අපරාධකරුවෙකු විසින් මෙම ඝාතන මෙහෙයවා ඇති බවට තොරතුරු ලැබී ඇතැයි උසස් පොලිස් නිලධාරියෙකු සදහන් කළා.

බාලේ මල්ලි නම් අපරාධකරු සමග ඝාතනයට ලක් වූ තරුණයන් දෙදෙනා ඇතිකර ගත් ආරවුලක් හේතුවෙන් මෙම ඝාතන සිදුකර ඇති බවට පොලීසිය සැකකරනවා.

දෙවුන්දර ශ්‍රී විෂ්ණු දේවාලයේ දකුණු වාහල්කඩ ඉදිරිපස සිංහාසන මාර්ගයේදී ඊයේ රාත්‍රී 11.45ට පමණ මෙම වෙඩිතැබීම සිදු වී තිබුණා.

ටී-56 වර්ගයේ ගිනිඅවියකින් හා පිස්තෝල වර්ගයේ ගිනිඅවියකින් වෙඩිතැබීම සිදුකර වෙඩික්කරුවන් පලාගොස් තිබු අතර වෙඩිප්‍රහාරයෙන් අදාළ තරුණයන් දෙදෙනා එම ස්ථානයේදීම ජීවිතක්ෂයට පත්වුණා.

වෙඩි ප්‍රහාරය එල්ල වූ ස්ථානයේ තිබී ටී-56 උණ්ඩ කොපු 39ක් හා මිලිමීටර 9 වර්ගයේ උණ්ඩ කොපු 2ක් පොලීසිය විසින් සොයාගෙන තිබෙනවා.

මෙලෙස ඝාතනයට ලක්ව තිබුණේ 29 හැවිරිදි පසිඳු තාරක හා යොමේෂ් නාදීශාන් නැමැති දෙවිනුවර ප්‍රදේශයේම පදිංචිකරුවන් දෙදෙනෙක්.

ඔහුන් දෙවිනුවර, කපුගම්පුර ප්‍රදේශයේ නිවසක පැවැති උපන්දින සාදයකට සහභාගි වී පැමිණෙමින් සිටියදී මෙලෙස වෙඩිතැබීම සිදුව තිබුණා.

වෑන් රථයකින් පැමිණි පිරිසක් අදාළ ස්ථානයේදී මෙම තරුණයන් දෙදෙනා ගමන්කරමින් සිටි යතුරුපැදිය, තම රිය ගැටීමට සලස්වා වෙඩිතැබීම සිදුකර ඇති බව පොලීසිය පවසන්නේ.

වෙඩික්කරුවන් පැමිණි වෑන් රථය ඝාතනය වූ ස්ථානයට මීටර 800ක් පමණ දුරින් වූ අතුරු මාර්ගයක දමා ගිනිතබා තිබියදී පොලීසිය විසින් පසුව සොයාගනු ලැබුවා.

වෙඩිතැබීම සිදුවූ ස්ථානයේ මහෙස්ත්‍රාත් පරීක්ෂණය මාතර අතිරේක මහෙස්ත්‍රාත් මාලන් ශිරාන් ජයසුරිය මහතා අද අළුයම සිදු කළා.