මාර්ග තුනක් යටතේ , සුපිරි බස් රථ 100ක් කොළඹට..|Hiru TV Blog

මාර්ග තුනක් යටතේ , සුපිරි බස් රථ 100ක් කොළඹට..

Monday, 17 February 2025 - 15:54 | Views - 2,007

පොදු ප්‍රවාහනය වැඩිදියුණු කිරීමේ මූලික පියවරක් වශයෙන් නවීන සහ සුවපහසු, දියුණු තාක්ෂණයන් සහිත බස්රථ සමූහයක් නියමු ව්‍යාපෘතියක් ලෙස හඳුන්වා දීමට කටයුතු කරන බව ජනාධිපති අනුර කුමාර දිසානයක පවසනවා.

කොළඹ නගර ප්‍රදේශය තුළ ප්‍රධාන මාර්ග කොරිඩෝ තුනක් ඔස්සේ මගී ප්‍රවේශය සඳහා (low floor buses) මෙම බස් රථ 100ක් යෙදවීමට අපේක්ෂා කරන බව ජනාධිපතිවරයා පවසන්නේ.

ඒ වෙනුවෙන රුපියල් මිලියන 3,000ක් වෙන්කිරීමට යෝජනා කර තිබෙනවා.

මේ අතර ලංකා ගමනාගමන මණ්ඩලය විසින් මගී ප්‍රවේශයට පහසු, බස් රථ 200ක් ඔවුන්ගේ අරමුදල් යොදාගනිමින් සේවයේ යෙදවීමට ද කටයුතු කරන බවයි ජනාධිපතිවරයා පැවසුවේ.

අලුතින් ස්ථාපිත කිරීමට අපේක්ෂිත මෙට්‍රෝ බස් සමාගම යටතේ මෙය ක්‍රියාත්මක වන අතර යෝජිත බස් සමාගම සම්පූර්ණයෙන්ම ඩිජිටල්කරණය වූ ක්‍රමවේදයක් මත ක්‍රියාත්මක වන බවයි පවසන්නේ.

දුර බැහැර හා නාගරික සහ උප නාගරික ප්‍රදේශවල දී දුම්රිය පොදු ප්‍රවාහනය ඉතා වැදගත් වන බැවින් මෙම දුම්රියවල දුර්වල තත්ත්වය මගීන්ගේ ආරක්ෂාවට, සුවපහසුවට සහ දුම්රියේ වේගයට සෘණාත්මකව බලපා ඇති බව ජනාධිපතිවරයා පෙන්වා දෙනවා.

පවතින දුම්රිය මැදිරි අලුත්වැඩියා කිරීම සහ ඉදිකිරීම කෙරෙහි අවධානය යොමු කරන අතරම එය කර්මාන්තයක් ලෙස ස්ථාපිත කිරීමේ වැදගත් කම ද ජනාධිපතිවරයා අවධාරණය කරනවා.

එහි පළමු පියවර ලෙස දුම්රිය සේවාවල කාර්යක්ෂමතාව ඉහළ නැංවීමට සහ වැඩිවන මගී ඉල්ලුමට සරිලන පරිදි සේවාවන් සැපයීමට, පැරණි මගී දුම්රිය මැදිරි ප්‍රතිසංස්කරණය කිරීමට බලාපොරොත්තු වන අතර ඒ සඳහා රුපියල් මිලියන 500ක් වෙන් කිරීමටද යෝජනා කර තිබෙනවා.

ඒ අනූව රට තුළ ඇති නව මගී දුම්රිය අවශ්‍යතා සපුරාලීමේ අරමුණින් නව දුම්රිය මැදිරි ඉදිකිරීම ආරම්භ කිරීමට 2025 වසර සඳහා දුම්රිය දෙපාර්තමේන්තුවට රුපියල් මිලියන 250ක් වෙන්කිරීමට ද මෙවර අයවැයෙන් යෝජනා කර තිබෙනවා.
‍
කාර්යක්ෂම දුම්රිය සේවාවක් සැපයීම සහ පොදු ප්‍රවාහන පහසුකම් වැඩිදියුණු කිරීම සඳහා දැනට ක්‍රියාත්මක වන කැලණිවැලි දුම්රිය මාර්ගය අවිස්සාවේල්ලෙන් ඔබ්බට අදියර වශයෙන් දීර්ඝ කිරීමට යෝජනා කොට තිබෙන අතර ඊට අදාළ මූලික වැඩකටයුතු ආරම්භ කිරීම සඳහා 2025 අයවැය තුළින් රුපියල් මිලියන 250ක් වෙන් කර තිබෙන බවයි ජනපතිවරයා පවසන්නේ.

මේ අතර ලංගම සහ පෞද්ගලික බස් ක්‍රියාකරුවන් අතර සෑම බස් මාර්ගයකම ඒකාබද්ධ කාලසටහනක් ක්‍රියාත්මක කිරීමේ හැකියාව සාකච්ඡා කිරීමෙන් පසුව ක්‍රියාත්මක කරන බවද පවසනවා.

මේ අතර ප්‍රාදේශීය සංවර්ධනය සම්බන්ධයෙන් වැදගත් බලපෑම් ඇති කරන මහනුවර බහුවිධ ප්‍රවාහන පර්යන්ත සංවර්ධන ව්‍යාපෘතිය සඳහා රජය අඛණ්ඩව ආයෝජනය කරන බවයි ජනාධිපතිවරයා වැඩි දුරටත් පෙන්වා දුන්නේ.

Share This Article