මිල උඩ ගිය ආනයනික පොල්තෙල්..|Hiru TV Blog

මිල උඩ ගිය ආනයනික පොල්තෙල්..

Thursday, 12 December 2024 - 10:46 | Views - 209

පොල් මිල ඉහළයාම හමුවේ දේශීය පොල්තෙල් නිෂ්පාදනයද ඇණහිට තිබෙනවා.

තවමත් වෙළෙඳපොළේ පොල් ගෙඩියක් අලෙවිවන්නේ රුපියල් 150ත් 200ත් අතර මිලකටයි.

දේශීය පොල්තෙල් නිෂ්පාදකයින් සඳහන් කළේ, වෙළෙඳපොළේ පවතින මිලට පොල් ගෙඩියක් මිලට ගෙන පොල් තෙල් නිෂ්පාදනය කිරීමෙන් ලාභයක් ලැබිය නොහැකි බවයි.

මේ හේතුවෙන් ආනයනික පොල්තෙල් කිලෝවක මිල රුපියල් 800 දක්වා ඉහළ ගොස් ඇති බවයි සමස්ත ලංකා පාරම්පරික පොල් තෙල් නිෂ්පාදකයින්ගේ සංගමයේ ප්‍රධාන කැදවුම්කරු බුද්ධික ද සිල්වා ප්‍රකාශ කළේ.

මේ අතර, පොල් මිල ඉහළ ගොස් ඇති පසුබිමක සහල් මිල සම්බන්ධයෙන් ද පවතින්නේ ගැටලුකාරී තත්ත්වයක්.

මෝල්හිමියන්ට රුපියල් 100ක් වැනි අඩු මිලකට ලබාදුන් වී, සහල් බවට පත්කර අධික මිල ගණන් යටතේ විකිණීම අසාධාරණ බවයි නාමල්ඔය ගොවිජන අයිතීන් සුරැකීමේ සංවිධානය චෝදනා කළේ.

මේ අතර, මහා පරිමාණ වී මෝල්හිමියන් පවසන ආකාරයට සහල් සඳහා උපරිම සිල්ලර මිලක් නියම කරමින් නිකුත් කළ ගැසට් නිවේදනය සංශෝධනය නොකළ යුතු බව සුළු හා මධ්‍ය පරිමාණ වී මෝල්හිමියන්ගේ සංගමය පවසනවා.

පාරිභෝගික ජනතාවද චෝදනා කළේ, සතොසෙහි සහල් සහ පොල් ප්‍රමාණවත් පරිදි නොමැති බවටයි.

මේ අතර, කැනඩාවට සහල් අපනයනය කරන මුවාවෙන් ඒවායේ කල් ඉකුත්වීමේ දින වෙනස් කර නැවත ඇසුරුම් කිරීමේ මහා පරිමාණ ජාවාරමක් හිරු සී.අයි.ඒ ලබාදුන් තොරතුරු මත වටලනු ලැබුවා.

පාරිභෝගික කටයුතු පිළිබඳ අධිකාරියේ නිලධාරීන් අදාළ වැටලීම සිදු කළේ බිංගිරිය - බෝවත්ත ප්‍රදේශයේ නිවසකදීයි.

පොළොන්නරුවේ මහා පරිමාන සහල් නිෂ්පාදකයෙකුගේ කිලෝ පහේ කීරි සම්බා සහල් උර තොග වශයෙන් රැස්කරගෙන බිංගිරිය - බෝවත්ත ප්‍රදේශයේ නිවසක් තුළ කිසියම් ජාවාරමක් සිදු වන බවට හිරු සී.අයි.ඒ වෙත පසුගිය දිනක තොරතුරු ලැබී තිබුණා.

Share This Article