ෆේස්බුක් හරහා හුවමාරු වන අසභ්‍ය වීඩියෝ සහ අසභ්‍ය ඡායාරූප නතර කිරීමට Facebook සමාගම පියවර ගෙන තිබෙනවා.

මේ සඳහා Facebook ආයතනය විසින් නවතම ක්‍රමවේදයක් හඳුන්වා දෙන බවයි විදෙස් මාධ්‍ය වාර්තා කරන්නේ.

අදාළ ක්‍රමවේදය හඳුන්වන්නේ Photo-Matching Technologies ලෙසයි.

ඒ අනුව යම් කිසි පුද්ගලයෙකුගේ අකමැත්තකින් ඔහුගේ හෝ ඇයගේ අසභ්‍ය වීඩියෝ පටයක් හෝ අසභ්‍ය ඡායාරූප Facebook හරහා හුවමාරු වුවහොත් ඔහුට හෝ ඇයට කඩිනමින් ඒ පිළිබඳව Facebook ආයතනයට Report කළ හැකියි.

එහිදී අදාළ කටයුතු සිදුකිරීමට පුහුණුව ලත් විශේෂ කණ්ඩායමක් විසින් අදාළ ඡායාරූප සම්බන්ධයෙන් සොයා බැලීමක් සිදුකර ඒවා ඉවත් කිරීමට කඩිනම් පියවර ගනු ඇති.

මේ අතර එවැනි අවස්ථාවල අපහසුතාවයට පත්වූ පාර්ශවය පිළිබඳව සලකා බලා අදාළ ඡායාරූප හුවමාරු වන Facebook ගිණුම් අත්හිටුවීමද සිදුවිය හැකි බවයි Facebook සමාගම නිකුත් කළ නිවේදනයක දැක්වෙන්නේ.

දැනට අන්තර්ජාලයට එක්කර ඇති අසභ්‍ය ඡායාරූප සහ අසභ්‍ය වීඩියෝ පටද මේ වනවිට Facebook සමාගම විසින් හඳුනාගෙන ඇති අතර අදාළ ක්‍රමවේදයට අනුව එවැනි දෑ Facebook ගිණුම් හරහා හුවමාරු කිරීමටද අවසර නොමැති බවයි එහි වැඩිදුරටත් දැක්වෙන්නේ.