කොරියානු විභාග අපේක්ෂකයන් ඉලක්ක කරගත් SMS වංචාව.. ව්‍යාජ බැංකු ගිණුම්වලට සල්ලි දාලා අමාරුවේ වැටෙන්න එපා..|Hiru TV Blog

කොරියානු විභාග අපේක්ෂකයන් ඉලක්ක කරගත් SMS වංචාව.. ව්‍යාජ බැංකු ගිණුම්වලට සල්ලි දාලා අමාරුවේ වැටෙන්න එපා..

Thursday, 29 October 2026 - 17:49 | Views - 35

කොරියාවට ගිහින් ජීවිතය ගොඩදාගන්න දහසක් බලාපොරොත්තු හිතේ තියාගෙන, දවල් රෑ නොබලා කොරියානු භාෂාව පාඩම් කරන අපේ තරුණ තරුණියන් ඉලක්ක කරගෙන ක්‍රියාත්මක වන අතිශය බිහිසුණු ජාවාරමක් ගැන මේ වන විට තොරතුරු අනාවරණය වී තිබෙනවා.

ශ්‍රී ලංකා විදේශ සේවා නියුක්ති කාර්යාංශයේ (SLBFE) නම කූට ලෙස භාවිත කරමින් සිදුකරන මහා පරිමාණ SMS වංචාවක්.

2026 වර්ෂය සඳහා වන කොරියානු භාෂා පරීක්ෂණයේ අයදුම්පත් කැඳවීම ඔක්තෝබර් 26 වැනිදා සිට ලබන 30 වැනිදා දක්වා කාර්යාංශයේ නිල වෙබ් අඩවිය ඔස්සේ පමණක් මාර්ගගතව (Online) සිදු කෙරෙමින් පවතිනවා.

මෙම අවස්ථාවෙන් උපරිම ප්‍රයෝජන ගෙන අහිංසක තරුණ තරුණියන්ගේ මුදල් කොල්ලකෑමට සැරසෙන පිරිසක් විදේශ සේවා නියුක්ති කාර්යාංශයේ නමින් ව්‍යාජ SMS පණිවිඩ යොමු කරමින් සිටින බවයි වාර්තා වන්නේ.

අදාළ වංචනික කෙටි පණිවිඩ මඟින් ව්‍යාජ බැංකු ගිණුම් අංකයක් ලබා දී, විභාග ගාස්තු හෝ වෙනත් මුදල් ඊට බැර කරන ලෙස අපේක්ෂකයින්ට දන්වා එවන බව අනාවරණය වී තිබෙනවා.

මෙවැනි කිසිදු පෞද්ගලික හෝ සැකකටයුතු ගිණුම්වලට මුදල් තැන්පත් නොකරන ලෙසත්, මෙය මුළුමනින්ම මුදල් වංචා කිරීමේ සංවිධානාත්මක කුමන්ත්‍රණයක් බවත් කාර්යාංශය දැඩි ලෙස අවධාරණය කරනවා.

ගෙවීම් සිදු කළ යුත්තේ කාර්යාංශයේ නිල වෙබ් අඩවියේ සඳහන් "ශ්‍රී ලංකා විදේශ සේවා නියුක්ති කාර්යාංශය" නමින් ඇති නිල රාජ්‍ය බැංකු ගිණුම්වලට පමණක් බව මතක තබා ගත යුතුයි.

යම් හෙයකින් ඔබටත් මෙවැනි සැකකටයුතු SMS පණිවිඩයක් ලැබුණහොත්, කිසිදු මුදලක් බැර කිරීමට පෙර විදේශ සේවා නියුක්ති කාර්යාංශයේ 1989 ක්ෂණික දුරකථන අංකය අමතා එහි සත්‍ය අසත්‍යතාව තහවුරු කරගන්නා ලෙස බලධාරීන් ඉල්ලා සිටිනවා.

කොරියානු රැකියා බලාපොරොත්තුවෙන් සිටින ඔබේ හිතවතුන් හෝ පවුලේ සාමාජිකයන් සිටී නම්, මේ කපටි උගුලට අසුවී තමන් මහන්සියෙන් හම්බකරපු මුදල් නැති නාස්ති කරගන්නට පෙර වහාම මේ පිළිබඳව ඔවුන්ව දැනුවත් කරන්න.