රට පුරා ශීඝ්‍රයෙන් පැතිර යන මාරක ඩෙංගු අවදානම.. වසරේ මේ දක්වා වාර්තා වූ සමස්ත ඩෙංගු රෝගීන් ගණන 72,430ක් දක්වා ඉහළට...|Hiru TV Blog

රට පුරා ශීඝ්‍රයෙන් පැතිර යන මාරක ඩෙංගු අවදානම.. වසරේ මේ දක්වා වාර්තා වූ සමස්ත ඩෙංගු රෝගීන් ගණන 72,430ක් දක්වා ඉහළට...

Thursday, 16 July 2026 - 17:10 | Views - 136

ඩෙංගු රෝගය තවදුරටත් රට තුළ ශීඝ්‍රයෙන් ව්‍යාප්ත වෙමින් පවතින පසුබිමක, වසරේ මේ දක්වා වාර්තා වී ඇති සමස්ත ඩෙංගු රෝගීන් සංඛ්‍යාව 72,430ක් දක්වා ඉහළ ගොස් තිබෙනවා.

ඒ ඊයේ (15) දින පැය 24ක කාලය තුළ පමණක් අලුතින් ඩෙංගු රෝගීන් 1,195ක් වාර්තා වීමත් සමඟයි.මේ වන විට මෙරටින් වාර්තා වී ඇති සමස්ත ඩෙංගු මරණ සංඛ්‍යාව 49ක්.

මෙවැනි අවදානම් සහගත පසුබිමක, රෝග ව්‍යාප්තිය පාලනය කිරීමේ අරමුණින් අද (16) සිට සෞඛ්‍ය වෛද්‍ය නිලධාරි කොට්ඨාස 63ක් ආවරණය කරමින් නැවතත් විශේෂ ඩෙංගු මර්දන වැඩසටහනක් ක්‍රියාත්මක කර ඇති බව ජාතික ඩෙංගු මර්දන ඒකකය ප්‍රකාශ කළා.

මීට සමගාමීව ප්‍රදේශ රැසක ඩෙංගු මර්දන වැඩසටහන් තවදුරටත් සක්‍රියව සිදු කරනවා. ශීඝ්‍රයෙන් පැතිර යන ඩෙංගු ව්‍යාප්තිය පාලනය කිරීම සඳහා ගාල්ල බන්ධනාගාර පරිශ්‍රය දුමායනය කිරීමට ද පියවර ගෙන තිබෙනවා.

එමෙන්ම, කොස්වත්ත රුහුණුපුර විශේෂ ඩෙංගු මර්දන වැඩසටහනක් ඊයේ දින බත්තරමුල්ල සෞඛ්‍ය වෛද්‍ය නිලධාරි කාර්යාලය විසින් සංවිධානය කිරීමට කටයුතු කළා.

මේ අතර, මදුරු කීටයන් සිටීම හේතුවෙන් ජාතික ජල සම්පාදන සහ ජල ප්‍රවාහන මණ්ඩලයේ බටපොත වැඩභාර නිලධාරී කාර්යාලයට එරෙහිව නඩු පැවරීමට ද සෞඛ්‍ය බලධාරීන් පියවර ගෙන තිබෙනවා.