නිශ්ශබ්දවම පැතිරෙන භයානක ලිංගාශ්‍රිත රෝග රැල්ල.. ආසාදිතයින් දසදහසේ සීමාව ඉක්මවා යයි..|Hiru TV Blog

නිශ්ශබ්දවම පැතිරෙන භයානක ලිංගාශ්‍රිත රෝග රැල්ල.. ආසාදිතයින් දසදහසේ සීමාව ඉක්මවා යයි..

Monday, 13 July 2026 - 14:36 | Views - 38

ශ්‍රී ලංකාව තුළ ඒඩ්ස් (AIDS) රෝගීන් හැර අනෙකුත් ලිංගාශ්‍රිත රෝගීන් දසදහස ඉක්මවා අතිශය ඉහළ අගයකින් වාර්තා වී ඇති බව ශ්‍රී ලංකා ජාතික ලිංගාශ්‍රිත හා ඒඩ්ස් මර්දන වැඩසටහන නිල වශයෙන් ප්‍රකාශ කර තිබෙනවා. සෞඛ්‍ය අංශ පෙන්වා දෙන්නේ මෙම බියකරු රෝගීන් සංඛ්‍යාව වාර්තා වී ඇත්තේ පසුගිය වසරේ සිට මේ දක්වා වූ කෙටි කාල සීමාව තුළදී බවයි.

මෙලෙස හඳුනාගත් සමස්ත රෝගීන් අතර හර්පීස්, ගොනෝරියා, උපදංශය (සිෆිලිස්) සහ ලිංගික ඉන්නන් ශරීරගත වූ රෝගීන් දසදහස් තිස් දෙදෙනකු (10,032) පසුවනවා. නිල දත්ත වාර්තාවලට අනුව හර්පීස් ආසාදිතයන් 2,920ක්, ලිංගික ඉන්නන් සහිත රෝගීන් 2,284ක්, සිෆිලිස් (Syphilis) රෝගීන් 1,289ක්, ගොනෝරියා (Gonorrhea) රෝගීන් 692ක් සහ වෙනත් ලිංගික රෝග ආසාදිතයන් 2,847ක් ලෙසයි සටහන් වන්නේ. එසේම, මෙම කාලය තුළ පමණක් අලුතින් හඳුනාගත් ඒඩ්ස් රෝගීන් සංඛ්‍යාව ද 874ක් දක්වා ඉහළ ගොස් තිබෙනවා.

විශේෂයෙන්ම ලිංගික ප්‍රදේශවල හටගන්නා අනපේක්ෂිත තුවාල, බිබිලි, ලිංගික අවයව ආශ්‍රිතව පවතින දැඩි වේදනාකාරී තත්ත්වයන්, ගැටිති වැනි රෝග ලක්ෂණ සහ දින තුනකට වඩා වැඩි කාලයක් පවතින තද උණ තත්ත්වයක් ඇත්නම්, කිසිදු ලැජ්ජාවකින් තොරව කඩිනමින් වෛද්‍ය පරීක්ෂණ සඳහා යොමුවීම අත්‍යවශ්‍ය බව වෛද්‍යවරුන් පෙන්වා දෙනවා.

අනාරක්ෂිත ලිංගික සබඳතාවල නිරතවන පුද්ගලයන් නිරන්තරයෙන්ම සායනික වෛද්‍ය පරීක්ෂණවලට යොමුවීමෙන් සහ මුල් අවධියේදීම නිසි ප්‍රතිකාර ලබාගැනීමෙන් මෙම භයානක රෝගී තත්ත්වයන් නිට්ටාවටම සුව කර ගැනීමට හැකියාව පවතිනවා.

මෙම විශේෂිත සෞඛ්‍ය පරීක්ෂණ ඉතාමත් රහස්‍ය අයුරින් සිදුකර ගැනීමට සහ ඒ සඳහා වේලාවන් වෙන්කරවා ගැනීමට KNOW4SURE.LK නිල වෙබ් අඩවියට පිවිසීමෙන් අවශ්‍ය සියලුම තොරතුරු සහ උපදෙස් ලබාගත හැකි බව එම වැඩසටහන වැඩිදුරටත් සඳහන් කළා.

මූලාශ්‍රය : අරුණ පුවත්පත ඇසුරෙන්..