"මදුරුවන්ට මාව විතරක් පේන්නේ ඇයි?" හැමදාම ඔබට වද දුන් ප්‍රශ්නයට විද්‍යාඥයින් දුන් ජීව විද්‍යාත්මක පිළිතුර මෙන්න..|Hiru TV Blog

"මදුරුවන්ට මාව විතරක් පේන්නේ ඇයි?" හැමදාම ඔබට වද දුන් ප්‍රශ්නයට විද්‍යාඥයින් දුන් ජීව විද්‍යාත්මක පිළිතුර මෙන්න..

Monday, 13 July 2026 - 10:03 | Views - 123

මදුරුවන් අපගේ සිරුරට දෂ්ට කිරීමට බොහෝ වෙලාවකට පෙර සිටම, එනම් ඈත තියාම අපගේ සිරුරෙන් නිකුත් වන විවිධ ජීව විද්‍යාත්මක සංඥා ඉතාමත් සූක්ෂ්ම ලෙස හඳුනාගැනීමේ විශ්මිත හැකියාව සතු බව විද්‍යාඥයින් පවසනවා. ඇතැම් පුද්ගලයන් පමණක් මදුරුවන්ගේ ප්‍රධාන සහ නිරන්තර ඉලක්ක බවට පත්වන්නේ ඇයිද යන්න පිළිබඳව ලෝක ප්‍රකට විද්‍යාඥයන් විසින් කරුණු රැසක් අනාවරණය කරගෙන තිබෙනවා.

"මගේ ලේ රස ඇති, ඒකයි මදුරුවන් මටම විදින්නේ" කියා ඔබත් සාමාන්‍යයෙන් සිතනවා ඇති. නමුත් එහි සැබෑ විද්‍යාත්මක හේතුව වන්නේ අපගේ සිරුරෙන් පිටවන හුස්ම සහ සිරුරේ ගඳ හෝ සුවඳ ඇතුළු විවිධ රසායනික සලකුණු මදුරුවන්ව තදින්ම ආකර්ෂණය කරගැනීමයි. මදුරුවන් විශේෂයෙන්ම ඇතැම් පුද්ගලයන්වම සොයාගෙන පැමිණීමට ප්‍රධාන ජීව විද්‍යාත්මක කරුණු 3ක් බලපානවා.

පළමු කරුණ වන්නේ කාබන් ඩයොක්සයිඩ් (CO2) වායුවයි. මිනිසුන්ට දෂ්ට කරනු ලබන්නේ ගැහැණු මදුරුවන් පමණක් වන අතර, ඒ ඔවුන්ගේ බිත්තර වර්ධනය සඳහා අවශ්‍ය ප්‍රෝටීන ලබා ගැනීමටයි. මීටර් 10ක් පමණ ඈත සිටම අපගේ හුස්මෙන් පිටකරන CO2 වායුව හඳුනා ගැනීමට මදුරුවන්ට හැකියාව පවතිනවා. වැඩිහිටියන් ළමයින්ට වඩා වැඩිපුර මෙම වායුව පිට කරන බැවින් මදුරුවන් ඔවුන් වෙත ආකර්ෂණය වීමේ ප්‍රවණතාව වැඩියි.

දෙවන කරුණ වන්නේ ශරීරයේ තාපය සහ දහඩියයි. මදුරුවන් ශරීරයේ උණුසුමට සහ තෙතමනයට බෙහෙවින් ප්‍රිය කරනවා. මේ හේතුව නිසා ගර්භණී කාන්තාවන් වෙත මදුරුවන් ආකර්ෂණය වීමේ ඉඩකඩ සාමාන්‍ය කාන්තාවන්ට වඩා දෙගුණයකින් වැඩියි. එමෙන්ම ව්‍යායාම කිරීමෙන් පසු, විශාල සිරුරක් ඇති පුද්ගලයන්ගෙන් වැඩිපුර තාපය පිටවන විට මදුරුවන් වැඩිපුර ආකර්ෂණය වනවා.

තෙවන කරුණ වන්නේ සමේ ඇති සුවඳ සහ බැක්ටීරියායි. අපේ සම මතුපිට ඇති බැක්ටීරියා මඟින් දහඩිය බිඳහෙලීමේදී වාෂ්පශීලී කාබනික සංයෝග (VOCs) නිපදවයි. විශේෂයෙන්ම සමේ ලැක්ටික් අම්ලය සහ කාබොක්සිලික් අම්ලය වැඩිපුර ඇති පුද්ගලයන් වෙත මදුරුවන් 100 ගුණයකින් පමණ වැඩිපුර ආකර්ෂණය වන බව පර්යේෂණවලින් හෙළි වී තිබෙනවා. මෙය බොහෝ දුරට ජානමය වශයෙන් උරුම වන තත්ත්වයකි.

බොහෝ දෙනා සිතන පරිදි සුදුළූණු ආහාරයට ගැනීම හෝ විටමින් B (Vitamin B) පෙති ගැනීමෙන් මදුරුවන් පලවා හැරිය හැකි බවට කිසිදු විද්‍යාත්මක සාක්ෂියක් නොමැති බව ස්කොට්ලන්තයේ ග්ලාස්ගෝ විශ්වවිද්‍යාලයේ මහාචාර්ය හෙදර් ෆර්ගියුසන් පවසනවා. ඇය නිර්දේශ කරන්නේ පිළිගත් මදුරු විකර්ෂක භාවිත කිරීම සහ සිරුර හොඳින් වැසෙන සේ දිග අත් සහිත ඇඳුම් ඇඳීමයි.

ඇතැම් පුද්ගලයන්ට මදුරුවන් විද්දත් ඔවුන්ට විශාල ලෙස කසන්නේ හෝ පලු දමන්නේ නැති අතර, තවත් සමහරුන්ට විශාල ලෙස පලු දමා සති ගණනාවක් කැසීම පවතින්නේ ඔවුන්ගේ ප්‍රතිශක්තිකරණ පද්ධතියේ ස්වභාවය අනුවයි. කෙසේ වෙතත්, තමන්ට මදුරුවන් විදින්නේ නැතැයි සිතන අය පවා මදුරුවන්ගෙන් බෝවන මාරක රෝගවලින් ආරක්ෂා වීම සඳහා අනිවාර්යයෙන්ම ස්වයං ආරක්ෂිත පියවර අනුගමනය කළ යුතු බව විද්‍යාඥයන් අවධාරණය කරනවා.

අරුණ පුවත්පත ඇසුරෙන්..