දිවයින පුරා ඩෙංගු රෝගීන් සංඛ්‍යාව 50,000 සීමාව ඉක්මවයි.. මහනුවර දිස්ත්‍රික්කයේ පාසල්වලින් 59%කම මදුරුවන් බෝවන තැන්..|Hiru TV Blog

දිවයින පුරා ඩෙංගු රෝගීන් සංඛ්‍යාව 50,000 සීමාව ඉක්මවයි.. මහනුවර දිස්ත්‍රික්කයේ පාසල්වලින් 59%කම මදුරුවන් බෝවන තැන්..

Saturday, 27 June 2026 - 16:30 | Views - 46

ලංකාව පුරා දැනට පවතින ඩෙංගු අධි වසංගත තත්ත්වය හමුවේ, මේ වසරේ ගත වූ කාලය තුළ වාර්තා වූ සමස්ත ඩෙංගු රෝගීන් සංඛ්‍යාව 50,000 සීමාව ඉක්මවා ගොස් තිබෙනවා.

ජාතික ඩෙංගු මර්දන ඒකකයේ දත්තවලට අනුව මේ වන විට දිවයිනෙන් වාර්තා වන සමස්ත ඩෙංගු රෝගීන් සංඛ්‍යාව 50,459ක් දක්වා ඉහළ ගොස් ඇති බව වාර්තා වුණා.

එමෙන්ම, ඩෙංගු රෝගය වැළඳීමෙන් මෙරට තුළ සිදුව ඇති මරණ සංඛ්‍යාව 30ක් බව ජාතික ඩෙංගු මර්දන ඒකකයේ ප්‍රජා වෛද්‍ය විශේෂඥ ප්‍රශිලා සමරවීර සඳහන් කළා. පවතින මෙම දැඩි අවදානම් තත්ත්වය සැලකිල්ලට ගනිමින් දිවයින පුරා ඩෙංගු මර්දන වැඩසටහන් තවදුරටත් දැඩිව ක්‍රියාත්මක කිරීමට පියවර ගෙන තිබෙනවා.

මේ අතර, මහනුවර දිස්ත්‍රික් ලේකම් කාර්යාලයේදී පැවැති විශේෂ ඩෙංගු මර්දන කමිටු රැස්වීමේදී අතිශය සංවේදී තොරතුරක් අනාවරණය වී තිබෙනවා.

මහනුවර දිස්ත්‍රික්කයේ පිහිටි පාසල් පරීක්ෂා කිරීමේදී ඉන් සියයට 59කම පමණ ඩෙංගු මදුරුවන් බෝ විය හැකි අවදානම් ස්ථාන හඳුනාගෙන ඇති බව එහිදී අදහස් දැක්වූ මධ්‍යම පළාත් සෞඛ්‍ය සේවා අධ්‍යක්ෂ වෛද්‍ය කුමුදු බණ්ඩාර පෙන්වා දුන්නා.

දුවා දරුවන්ගේ සහ මහජනතාවගේ ආරක්ෂාව වෙනුවෙන් තමන් අවට පරිසරය පිරිසිදුව තබා ගැනීමට වහාම පියවර ගන්නා ලෙස සෞඛ්‍ය අංශ ජනතාවගෙන් දැඩිව ඉල්ලා සිටිනවා.

Share This Article