ඩෙංගු වසංගතය අනපේක්ෂිත ලෙස වර්ධනය වෙයි.. රෝහල් ධාරිතාවත් පිරෙයි.. දින 3ක විශේෂ මෙහෙයුමක් ඇරඹෙයි.|Hiru TV Blog

ඩෙංගු වසංගතය අනපේක්ෂිත ලෙස වර්ධනය වෙයි.. රෝහල් ධාරිතාවත් පිරෙයි.. දින 3ක විශේෂ මෙහෙයුමක් ඇරඹෙයි.

Thursday, 25 June 2026 - 13:22 | Views - 170

ඩෙංගු වසංගතය මේ වන විට අපේක්ෂා නොකළ අන්දමින් වර්ධනය වෙමින් පවතින බව ශ්‍රී ලංකා මහජන සෞඛ්‍ය පරීක්ෂකවරුන්ගේ සංගමය අනතුරු අඟවනවා.

විශේෂයෙන්ම රාජ්‍ය ආයතන සහ ආගමික ස්ථානවල මෙම ඩෙංගු තත්ත්වය ඉතා බරපතල ලෙස වාර්තා වන බව එම සංගමයේ වැඩබලන සභාපති උපුල් රෝහණ සඳහන් කළා.

පවතින තත්ත්වය සැලකිල්ලට ගනිමින් ඩෙංගු රෝගය වළක්වා ගැනීම සහ පාලනය කිරීම වෙනුවෙන් නව චක්‍රලේඛයක් නිකුත් කර තිබෙනවා.

ඒ අනුව ඊයේ (ජුනි 24) සිට හෙට (ජුනි 26) දක්වා ක්‍රියාත්මක වන පරිදි දින 3ක විශේෂ ඩෙංගු මර්දන මෙහෙයුමක් ද ප්‍රකාශයට පත් කර තිබෙනවා.

ජාතික ඩෙංගු මර්දන ඒකකයේ නවතම දත්තවලට අනුව වසංගතයේ වත්මන් තත්ත්වය මෙසේය:

ඩෙංගු හේතුවෙන් මේ වන විට පුද්ගල මරණ 29ක් සිදුව ඇති අතර වසරේ මේ දක්වා ගත වූ කාලය තුළ වාර්තා වී ඇති සමස්ත ඩෙංගු රෝගීන් සංඛ්‍යාව 48,287ක් දක්වා ඉහළ ගොස් තිබෙනවා. සමස්ත රෝගීන්ගෙන් සියයට 52ක්ම වාර්තා වන්නේ බස්නාහිර පළාතෙන් වන අතර එම සංඛ්‍යාව 25,167ක් ලෙස සටහන් වුණා.

ඩෙංගු අධි අවදානම් කලාප ලෙස හඳුනාගෙන ඇති සෞඛ්‍ය වෛද්‍ය නිලධාරී (MOH) කොට්ඨාස ගණන 112ක් දක්වා ඉහළ ගොස් තිබෙනවා.

දිනෙන් දින රෝගීන් වාර්තා වීම ඉහළ යාම හේතුවෙන් රෝහල් ධාරිතාව ද ඉක්මවා ගොස් ඇති බව සෞඛ්‍ය අංශ පවසනවා.

කළුබෝවිල ශික්ෂණ රෝහල සහ IDH රෝහල මේ වන විටත් ඩෙංගු රෝගීන්ගෙන් උපරිම ධාරිතාවට පැමිණ ඇති බව ජාතික ඩෙංගු මර්දන ඒකකය ප්‍රකාශ කළා.

ඩෙංගු රෝගයට අමතරව මේ දිනවල චිකුන්ගුන්යා රෝගය ද හිස ඔසවමින් පවතින බව මේ අතර කොළඹ පැවැති මාධ්‍ය හමුවකදී ජාතික ඩෙංගු මර්දන ඒකකයේ වැඩබලන අධ්‍යක්ෂ වෛද්‍ය කපිල කන්නංගර අනාවරණය කළා.