අපේ පද්ධතියට දරාගන්න බෑ.. තත්ත්වය භයානකයි" රෝහල්වලින් රතු නිවේදන! ඩෙංගු මාරයා ලංකාවම බිලිගන්න යන්නේ මෙහෙමයි.|Hiru TV Blog

අපේ පද්ධතියට දරාගන්න බෑ.. තත්ත්වය භයානකයි" රෝහල්වලින් රතු නිවේදන! ඩෙංගු මාරයා ලංකාවම බිලිගන්න යන්නේ මෙහෙමයි.

Monday, 15 June 2026 - 10:17 | Views - 120

රටේ තියෙන රස්නෙයි, හිටපු ගමන් කඩාපාත් වෙන වැස්සයි අස්සේ ලොකුම අනතුරක් දැන් අපේ පස්සෙන් එනවා. නිකන්ම නිකන් උණක් කියලා හිතලා ගෙදරට වෙලා හිටියොත් නම් මේ දවස්වල අනිවාර්යයෙන්ම පණ පිටින් ඉන්න වෙන්නේ නෑ. රජයේ වෛද්‍ය නිලධාරීන්ගේ සංගමය වගේම ජාතික ඩෙංගු මර්දන ඒකකයෙනුත් දැන් මුළු රටටම භයානක රතු නිවේදනයක් නිකුත් කරලා ඉවරයි.

මේ වෙද්දී ලංකාව පුරාම ඩෙංගු රෝගීන් රෝහල්ගත වීමේ සීඝ්‍ර වර්ධනයක් තියෙනවා කියලා තමයි ආරංචි වෙන්නේ. ජාතික ඩෙංගු මර්දන ඒකකයේ වැඩබලන අධ්‍යක්ෂ වෛද්‍ය කපිල කන්නන්ගර මහත්තයා කියන විදිහට මේ සංඛ්‍යා ලේඛන දැක්කම ඇත්තටම බය හිතෙනවා.

මුළු රෝගීන් ගණන- මේ වෙද්දී ලංකාවෙන් ඩෙංගු රෝගීන් 41,144ක් වාර්තා වෙලා තියෙනවා.
බස්නාහිරට මරණ වරෙන්තුවක්- මේ රෝගීන්ගෙන් හරියටම භාගයකටත් වඩා, ඒ කියන්නේ 51%ක්ම ඉන්නේ බස්නාහිර පළාතේ.

දෛනික රෝගීන්- එක දවසකට රෝගීන් 750ක් දක්වා රෝහල්වලට එනවලු. (අද වෙද්දී ඒක 630ක් වුණත් ඒකත් ඉතාම භයානක මට්ටමක්)

බිලිගත් ජීවිත- මේ වෙද්දීත් ඩෙංගු මාරයා අපේ රටේ ජීවිත 24ක්ම බිලි අරගෙන ඉවරයි.

"රෝහල්වල වාට්ටුවල විශාල සංඛ්‍යාවක් මේ රෝගීන් ප්‍රතිකාර ගන්නවා. රෝහල්වලින් දැනටමත් රතු නිවේදන නිකුත් කරලා තියෙන්නේ. මේ තත්ත්වය තවත් දුරටත් වැඩි වුණොත් ගොඩක් භයානක වෙන්න පුළුවන්. අපේ සෞඛ්‍ය පද්ධතියට මේක දරාගත නොහැකි තත්ත්වයක් වෙන්න පුළුවන්" කියලා වෛද්‍ය කපිල කන්නන්ගර මහත්තයා දැඩි අනතුරු ඇඟවීමක් කරනවා.

ඇඳන් නැතුව බිම ඉඳන් බෙහෙත් ගන්න වෙන දවස වැඩි ඈතක නෑ යාළුවනේ. සෞඛ්‍ය පද්ධතියම කඩාගෙන වැටෙන්න ඔන්න මෙන්න තියෙන්නේ. ඒ නිසා පොඩ්ඩක් හරි උණක්, ඇඟපතේ අමාරුවක් තියෙනවා නම් ගෙදරට වෙලා කසාය බිබී ඉන්න එපා, ඉක්මනටම ඩොක්ටර් කෙනෙක් හම්බවෙන්න. ඒ වගේම අදම තමන්ගේ වත්තේ තියෙන වතුර පිරෙන තැන් ටික සුද්ද කරගන්න. නැත්නම් ඊළඟට රෝහල් වාට්ටුවේ ඇඳක් හොයන්න වෙන්නේ ඔයාටම වෙන්න පුළුවන්.