වසර 50ක කාටූන් ඉතිහාසය උඩුයටිකුරු කරමින්, 2027දී එන 'Scooby-Doo Origins' ටෙලිමාලාව ගැන අලුත්ම තොරතුරු රැසක් එළියට..|Hiru TV Blog

වසර 50ක කාටූන් ඉතිහාසය උඩුයටිකුරු කරමින්, 2027දී එන 'Scooby-Doo Origins' ටෙලිමාලාව ගැන අලුත්ම තොරතුරු රැසක් එළියට..

Tuesday, 09 June 2026 - 16:42 | Views - 144

නෙට්ෆ්ලික්ස් (Netflix) සේවාව ඔස්සේ 2027 වසරේදී විකාශනය වීමට නියමිත 'Scooby-Doo: Origins' සජීවීකරණ ටෙලි වෘතාන්තය පිළිබඳව මෙතෙක් අනාවරණය නොවූ අතිශය රසවත් තොරතුරු රැසක් නිල වශයෙන් ප්‍රකාශයට පත් කර තිබෙනවා.

වසර 50කට අධික ස්කූබි-ඩූ ඉතිහාසය උඩුයටිකුරු කරමින්, මෙතෙක් කාටූන් හෝ පරිගණක සජීවීකරණ (CGI) මඟින් අප දුටු 'ස්කූබි-ඩූ' චරිතය වෙනුවට, සැබෑ සුනඛයෙකු මෙම චරිතය සඳහා යොදාගන්නා ප්‍රථම අවස්ථාව මෙය වීම සුවිශේෂී කරුණකි. නිකුත් වූ නවතම පූර්ව ප්‍රචාරක පටයට අනුව, සිය ප්‍රකට නිල්-කොළ පැහැති කරපටිය (Teal collar) පැළඳි මෙම සුනඛ පැටවා සහ ඔහුගේ හොඳම මිතුරා වන 'ෂැගී' (Shaggy) වනාන්තරයක් තුළදී ප්‍රථම වරට මුණගැසෙන ආකාරය ඉතාම ආකර්ෂණීය ලෙස නිරූපණය කර තිබෙනවා.

මෙම ටෙලිමාලාව සඳහා දායක වන ප්‍රධාන නළු නිළි මඬුල්ල ද මේ වන විට නිල වශයෙන් ප්‍රකාශයට පත් කර ඇති අතර, ඒ අනුව:

ෂැගී (Shaggy Rogers) - ටැනර් හේගන් (Tanner Hagen)
ඩැෆ්නි (Daphne Blake) -මැකෙන්නා ග්‍රේස් (Mckenna Grace)
වෙල්මා (Velma Dinkley) - ඇබී රයිඩර් ෆෝර්ට්සන් (Abby Ryder Fortson)
ෆ්‍රෙඩ් (Fred Jones) - මැක්ස්වෙල් ජෙන්කින්ස් (Maxwell Jenkins) යන යොවුන් නළු නිළියන් විසින් චරිත සඳහා පණ පොවනු ලබනවා.

මීට අමතරව ප්‍රසිද්ධ නළු පෝල් වෝල්ටර් හවුසර් (Paul Walter Hauser) ද මෙහි රංගනයෙන් එක්වනවා.

කථා පුවතට අනුව, ෂැගී සහ ඩැෆ්නි ඔවුන්ගේ ගිම්හාන කඳවුරක ගත කරන අවසන් සමයේදී, අද්භූත මිනීමැරුමකට සාක්ෂිකරුවෙකු වූ අසරණ ග්‍රේට් ඩේන් (Great Dane) සුනඛ පැටවෙකු ඔවුන්ට හමුවනවා. ඉන් අනතුරුව වෙල්මා සහ කණ්ඩායමට අලුතින් එකතු වන ෆ්‍රෙඩ් සමඟ එක්ව, ඔවුන් මුහුණ දෙන පළමු බිහිසුණු අභිරහස විසඳීමටත්, එමඟින් 'Mystery Inc.' කණ්ඩායම නිර්මාණය වන ආකාරයත් මෙහිදී දිගහැරෙනු ඇත.

ප්‍රකට 'Hanna-Barbera' කාටූන් චරිත ඇසුරින් නිර්මාණය වන මෙම දැවැන්ත ව්‍යාපෘතියේ නිෂ්පාදන කටයුතු පසුගිය අප්‍රේල් මාසයේදී ඇමරිකාවේ ඇට්ලන්ටා නුවරදී ආරම්භ වූ අතර, ජොෂ් ඇපල්බෝම්, ස්කොට් රොසෙන්බර්ග් සහ ග්‍රෙග් බර්ලන්ටි ඇතුළු ප්‍රකට හොලිවුඩ් සිනමාකරුවන් පිරිසක් මෙහි විධායක නිෂ්පාදනයෙන් දායක වනවා.