ගැබිණි මව්වරුන් වෙනුවෙන් ජාතික වැඩසටහනක්.. ලෝක සෞඛ්‍ය සංවිධානයේ ඇගයීමට ලක්වූ මීළඟ දැවැන්ත පියවර මෙන්න.|Hiru TV Blog

ගැබිණි මව්වරුන් වෙනුවෙන් ජාතික වැඩසටහනක්.. ලෝක සෞඛ්‍ය සංවිධානයේ ඇගයීමට ලක්වූ මීළඟ දැවැන්ත පියවර මෙන්න.

Wednesday, 03 June 2026 - 9:51 | Views - 212

මෙරට අනාගත පරපුර බරපතළ සෞඛ්‍ය අවදානම්වලින් ආරක්ෂා කර ගැනීම වෙනුවෙන් සෞඛ්‍ය අමාත්‍යාංශය විසින් ඉතාමත් සුවිශේෂී ජාතික වැඩපිළිවෙළක් දිවයින පුරා නිල වශයෙන් ආරම්භ කර තිබෙනවා.

මවගෙන් දරුවාට මානව ප්‍රතිශක්ති ඌනතා වෛරසය (HIV), උපදංශය (Syphilis) හා හෙපටයිටිස් - බී (Hepatitis B) වෛරසය සම්ප්‍රේෂණය වීම මුළුමනින්ම වැළැක්වීම සඳහා වන "ත්‍රිත්ව තුරන් කිරීමේ" (Triple Elimination) ජාතික වැඩසටහන ඉකුත් 01 දා සිට දිවයිනේ සියලුම මාතෘ සායනවලදී මෙලෙස ආරම්භ කළ බව සෞඛ්‍ය අමාත්‍යාංශය පවසනවා.

සෞඛ්‍ය අමාත්‍යාංශය සඳහන් කරන පරිදි, අද සිට ඉදිරියට දිවයිනේ ඕනෑම රජයේ මාතෘ සායනයකට පැමිණ අලුතින් ලියාපදිංචි වන සියලුම ගැබිණි මව්වරුන්ගේ රුධිරය, විශේෂ පරීක්ෂාවකට ලක් කිරීමට කටයුතු යොදා තිබෙනවා.

මෙහි ප්‍රධානතම අරමුණ වන්නේ මවගේ සිරුර තුළ හෙපටයිටිස් - බී වෛරසය තිබේදැයි කලින්ම හඳුනාගෙන, දරුවා ඉපදීමට පෙරම අවශ්‍ය වෛද්‍ය ප්‍රතිකාර ලබාදීමයි.

මේ වන විටත් දිවයින පුරා පිහිටි සායන මට්ටමින් මේ සඳහා අවශ්‍ය කටයුතු සූදානම් කර තිබෙනවා.

මවගෙන් දරුවාට HIV හා උපදංශ රෝගය බෝවීම වැළැක්වීම සඳහා රුධිරය පරීක්ෂා කිරීමේ "ද්විත්ව තුරන් කිරීමේ" (Dual Elimination) වැඩසටහන කලක සිට ශ්‍රී ලංකාව තුළ ඉතාමත් සාර්ථකව ක්‍රියාත්මක වුණා.

එම විශිෂ්ට සාර්ථකත්වය අගය කරමින්, මවගෙන් දරුවාට HIV හා උපදංශය සම්ප්‍රේෂණය වීම සම්පූර්ණයෙන්ම වැළැක්වූ ආදර්ශමත් රටක් ලෙස වසර 2019 දී ලෝක සෞඛ්‍ය සංවිධානය (WHO) විසින් ශ්‍රී ලංකාවට නිල සහතිකය පිරිනමා තිබුණා.

එතැන් පටන් අඛණ්ඩවම මෙම ප්‍රශංසනීය තත්ත්වය පවත්වාගෙන යාමට ශ්‍රී ලංකාව සමත්ව සිටිනවා.

එම සාර්ථක පියවරෙහි මීළඟ අදියර ලෙසයි හෙපටයිටිස් - බී වෛරසය ද ඇතුළත් කරමින් මෙම "ත්‍රිත්ව තුරන් කිරීමේ" වැඩපිළිවෙළ අද සිට රට පුරා නිල වශයෙන් ක්‍රියාත්මක කිරීමට සෞඛ්‍ය අමාත්‍යාංශය පියවර ගත්තා.

Share This Article