හැමෝම ආදරය කරන මේ සත්තුන්ගෙන් තමයි ලොකුම අවදානම.. සෞඛ්‍ය අංශවලින් ජනතාවට අනතුරු ඇඟවීමක්..|Hiru TV Blog

හැමෝම ආදරය කරන මේ සත්තුන්ගෙන් තමයි ලොකුම අවදානම.. සෞඛ්‍ය අංශවලින් ජනතාවට අනතුරු ඇඟවීමක්..

Tuesday, 02 June 2026 - 14:16 | Views - 294

මෙරට ගෘහාශ්‍රිත හා වීදි සුනඛයන් ලක්ෂ තිහක් (මිලියන 03ක්) පමණ ජීවත් වන නමුත්, ඒ අතරින් එන්නත්කරණයට ලක්වනුයේ සියයට පනස් හතරක් (54%) වැනි සතුන් ප්‍රමාණයක් පමණක් බව ජලභීතිකා මර්දන ව්‍යාපාරයේ අධ්‍යක්ෂ වෛද්‍ය ආචාර්ය නිරෝෂන් ගමගේ පවසනවා.

පසුගියදා (22 වැනිදා) සබරගමු පළාත් ආණ්ඩුකාර චම්පා ජානකී රාජරත්නගේ ප්‍රධානත්වයෙන් සබරගමුව පළාත් ආණ්ඩුකාර කාර්යාල ශ්‍රවණාගාරයේදී පැවැති රත්නපුර දිස්ත්‍රික්කයේ ජලභීතිකා රෝගය අවම කිරීම සඳහා වූ සමාරම්භක රැස්වීමට එක් වෙමින් මේ බව පවසා සිටියා.

ලබාදී ඇති දත්ත වාර්තාවලට අනුව පසුගිය වසරේදී පමණක් ජලභීතිකා රෝගය වැළඳීම හේතුවෙන් මෙරට පුද්ගල මරණ 14ක් වාර්තා වී තිබෙනවා.

මේ වනවිටත් රත්නපුර, කුරුණෑගල, යාපනය හා කොළඹ යන දිස්ත්‍රික්ක ජලභීතිකා රෝගය ව්‍යාප්ත වීමේ අධි අවදානම් කලාප ලෙස සෞඛ්‍ය අංශ විසින් හඳුනාගෙන තිබෙනවා.

මෙරට ජලභීතිකා රෝගය බෝවීම සඳහා සියයට අනූ අටක්ම (98%) හේතුවී ඇත්තේ සුනඛයන් බව අනාවරණය වී තිබෙනවා.

විශේෂයෙන්ම වීදි සුනඛයන්ට වඩා ගෘහාශ්‍රිතව ඇති දැඩි කරන සුනඛයන් නිසා ජලභීතිකාව වැළඳීමේ ප්‍රවණතාවය ඉහළ මට්ටමක පවතින බව වෛද්‍යවරයා පෙන්වා දුන්නා.

මෙරට සෑම මිනිසුන් අට දෙනකුටම එක් සුනඛයෙකු බැගින් සිටිනවා. සුනඛයන් හැරුණු කොට බළලා, ගවයා හා ලේනා වැනි සෙසු ක්ෂීරපායී සතුන් හේතුවෙන් ජලභීතිකාව ඇති වීමේ ප්‍රවණතාවය පවතින්නේ සියයට දෙකක් (2%) වැනි සුළු අගයකයි.

ජලභීතිකා මර්දනය හා සුනඛයන් වෙනුවෙන් රජය විසින් වාර්ෂිකව රුපියල් බිලියන පහකට (කෝටි 500කට) අධික දැවැන්ත මුදලක් වැය කරනු ලබනවා.

සතුන් සපා කෑම නිසා තුවාල ලබන මිනිසුන් වෙනුවෙන් ලබාදෙන ප්‍රතිජලභීතිකා එන්නත් සඳහා පමණක් රුපියල් මිලියන 4,000ක් (බිලියන 04ක්) වැය වන අතර, එක් සුනඛයෙකු එන්නත් කිරීම සඳහා රජයට රුපියල් 3,500 ක මුදලක් වැය වන බවයි එම ව්‍යාපාරයේ අධ්‍යක්ෂවරයා වැඩිදුරටත් සඳහන් කළා.

අරුණ පුවත්පත ඇසුරෙන්..