කොරෝනාවට පසු ලෝකයම යළිත් බිය කළ කොංගෝවේ ‘ඉබෝලා’ වෛරස් ව්‍යාප්තිය.. සෞඛ්‍ය පද්ධතිය බිඳ වැටීමේ අනතුරක!|Hiru TV Blog

කොරෝනාවට පසු ලෝකයම යළිත් බිය කළ කොංගෝවේ ‘ඉබෝලා’ වෛරස් ව්‍යාප්තිය.. සෞඛ්‍ය පද්ධතිය බිඳ වැටීමේ අනතුරක!

Sunday, 31 May 2026 - 16:11 | Views - 54

කොරෝනා වසංගතයෙන් පසුව ලෝකයම නැවතත් දරුණු වෛරස් භීතියකට ඇද දමමින්, අප්‍රිකානු මහද්වීපයේ පිහිටි කොංගෝ රාජ්‍යයෙන් ඉතාමත් බියජනක පුවතක් වාර්තා වනවා.

ඒ එරට තුළ අතිශය මාරාන්තික "ඉබෝලා" වෛරසය ඉතාමත් වේගයෙන් සහ දරුණු ලෙස පැතිර යමින් පවතින බවයි.

මේ සම්බන්ධයෙන් ජාත්‍යන්තර සෞඛ්‍ය අංශ මේ වන විටත් මුළු ලෝකයටම දැඩි අනතුරු ඇඟවීමක් නිකුත් කර තිබෙනවා.

විදෙස් මාධ්‍ය වාර්තා කරන පරිදි, කොංගෝ රාජ්‍යය තුළ ඉබෝලා වෛරසය පැතිර යන බව නිල වශයෙන් ප්‍රකාශයට පත් කර තවමත් ගත වී තිබෙන්නේ සති දෙකක් වැනි ඉතාමත් කෙටි කාලයක් පමණයි.

කෙසේවෙතත්, මෙම සති දෙක ඇතුළත රෝගීන් වාර්තා වීම කොංගෝ ඉතිහාසයේ කවදාවත් නැති තරම් පෙර නොවූ විරූ මට්ටමකට ඉහළ ගොස් ඇති බව සෞඛ්‍ය අංශ පෙන්වා දෙනවා.

පාලනයකින් තොරව සිදුවන මෙම ශීඝ්‍ර වෛරස් ව්‍යාප්තිය නිසා කොංගෝවේ සමස්ත සෞඛ්‍ය පද්ධතිය පවා සම්පූර්ණයෙන්ම බිඳ වැටීමේ දැඩි තර්ජනයකට ලක්වෙලා තිබෙනවා.

කලින් කලට ලෝකයේ විවිධ ප්‍රදේශවලින් හිස ඔසවන ඉබෝලා වෛරසය යනු, ශරීරයට ආසාදනය වන රෝගීන්ගෙන් බහුතරයක් මරණයට පත් කරන ඉතාමත් භයානක ලේ ගැලීමේ උණ තත්ත්වයක් (Hemorrhagic Fever) වනවා.

කොංගෝවෙන් වාර්තා වන මෙම දරුණු තත්ත්වයත් සමඟ, අදාළ වෛරසය අනෙකුත් රටවලටත් පැතිර යා හැකි බවට වූ දැඩි බිය සහ අවධානය මේ වන විට ලෝක සෞඛ්‍ය සංවිධානය ඇතුළු ජාත්‍යන්තර සෞඛ්‍ය සංවිධාන වෙත මතුව තිබෙනවා.

අප්‍රිකානු මහද්වීපයෙන් එන බියජනක පුවත.. කොංගෝවේ ඉබෝලා වෛරස් ව්‍යාප්තිය පාලනයෙන් ගිලිහෙයි.