ලංකාවේ සිදුවන මරණවලින් 34%කටම හේතුව මෙන්න.. සෞඛ්‍ය අංශවලින් රටටම අනතුරු ඇඟවීමක්..|Hiru TV Blog

ලංකාවේ සිදුවන මරණවලින් 34%කටම හේතුව මෙන්න.. සෞඛ්‍ය අංශවලින් රටටම අනතුරු ඇඟවීමක්..

Thursday, 21 May 2026 - 14:29 | Views - 80

ශ්‍රී ලංකාවේ වෙසෙන සමස්ත ජනතාවම තමන්ගේ සෞඛ්‍යය හා ජීවන රටාව පිළිබඳව දැඩි ලෙස කල්පනා කළ යුතු හා කනගාටුවට පත්විය යුතු අතිශය බිහිසුණු සංඛ්‍යාලේඛනයක් සෞඛ්‍ය අංශ විසින් අනාවරණය කර තිබෙනවා.

ඒ අනුව මෙරට සමස්ත ජනගහනයෙන් සෑම පුද්ගලයන් තුන්දෙනෙකුගෙන් එක් අයෙකුම (1/3) අධි රුධිර පීඩනයෙන් (High Blood Pressure) පෙළෙන බව වෛද්‍ය වාර්තා පෙන්වා දුන්නා.

පසුගිය මැයි 17 වැනිදාට යෙදී තිබූ "ගෝලීය අධි රුධිර පීඩන දිනට" සමගාමීව සෞඛ්‍ය බලධාරීන් සහ විශේෂඥ වෛද්‍යවරුන් විසින් මෙම තීරණාත්මක තොරතුරු රට හමුවේ අනාවරණය කිරීමට කටයුතු කර සිටියා.

මේ අනාවරණයේ පවතින සුවිශේෂීම සහ භයානකම තත්ත්වය වන්නේ, අධි රුධිර පීඩනය පවතින බවට හඳුනාගත් පුද්ගලයන්ගෙන් සියයට 63.9 ක තරම් අතිවිශාල පිරිසක් ඊට අදාළව නිසි වෛද්‍ය ප්‍රතිකාර ලබා නොගැනීමයි.

අධි රුධිර පීඩනය යනු ශරීරය තුළ බාහිර රෝග ලක්ෂණ නොපෙන්වා වැළඳෙන "නිහඬ මාරයෙකු" (Silent Killer) බැවින්, බොහෝ දෙනෙකු තමන්ට රෝගය වැළඳී ඇති බව නොදැනීම හෝ ප්‍රතිකාර නොසලකා හැරීම මීට හේතුව වී තිබෙනවා.

ප්‍රතිකාර නොලබා සිටීම හා පවතින අධි රුධිර පීඩන තත්ත්වය හේතුවෙන් මෙරට ජනතාව මුහුණ දෙන ප්‍රධානතම අවදානම වන්නේ හෘදයාබාධ (Heart Attacks) වැළඳීමයි.

මෙරට සිදුවන සමස්ත මරණවලින් 34% ක්ම, එනම් තුනෙන් එකකට වඩා වැඩි ප්‍රමාණයක් සිදුවන්නේ හදවත් ආශ්‍රිත රෝගාබාධ හේතුවෙන් බව සෞඛ්‍ය අංශ පෙන්වා දුන්නා.

පවතින ආතති සහගත ජීවන රටාව, වැරදි ආහාර රටාවන්, ලුණු අධික ලෙස භාවිතය, ව්‍යායාම මදිකම හා දුම්වැටි/මත්පැන් භාවිතය මෙලෙස රුධිර පීඩනය ඉහළ යාමට සෘජුවම බලපාන බව වෛද්‍යවරුන් පවසනවා.

නිරන්තරයෙන් තමන්ගේ රුධිර පීඩනය පරීක්ෂා කරගැනීම, නිවැරදි සෞඛ්‍ය පුරුදු ඇති කරගැනීම හා වෛද්‍ය උපදෙස් මත නිසි පරිදි ඖෂධ භාවිත කිරීම මඟින් මේ බිහිසුණු අවදානමෙන් බේරීමට හැකි බව සෞඛ්‍ය අමාත්‍යාංශය අවධාරණය කළා.